Ахмет Байтұрсынов туралы фактілер: ақпараттық сағат ағылшын тілінде

27 сәуір күні ШҚО Абай атындағы әмбебап кітапханасында Семей медицина университетінің шетелдік студенттеріне арналған «А.Байтұрсынов туралы фактілер» атты ағылшын тілінде ақпараттық сағат өткізілді.

Ақпараттық сағат қазақтың біртуар ақыны, ағартушы Ахмет Байтұрсынұлының 150-жылдық мерейтойына орай ұйымдастырылды. Шара барысында шетел әдебиеттері бөлімінің маманы Пәкістан елінен келген студенттерге қазақтың кемеңгер ақыны А.Байтұрсынұлының өмірі мен шығармашылығы туралы қызықты деректерді ағылшын тілінде баяндап берді.

Іс-шара аясында шетелдік студенттер назарына қазақ тіл білімінің атасы – А.Байтұрсыновтың өмір жолын қамтитын тың деректер жинақталған «Ұлттың ұлы ұстазы» атты слайд көрсетілім ұсынылды. А.Байтұрсынұлының “Әдебиет танытқыш” атты әдебиеттану ғылымы мен қазақ әдебиеті тарихына арналған тұңғыш зерттеу жұмысы, «Тіл білімі» атты көлемді еңбегі, «Маса» атты жинағы шараға қатысушылар тарапынан аса қызығушылық тудырды.

Шара соңында қатысушыларға А.Байтұрсынов туралы фактілер бойынша викториналық сұрақтар қойылды. Студенттер белсенді түрде жауап беріп, кітапхана атынан ынталандырылды. Қатысушылар қазақтың танымал тұлғаларын шетелдік студенттерге таныту мақсатында ұйымдастырылған шара үшін кітапханаға өз алғыстарын білдірді.