Қазақ халқының ғасырлық тұлғасы: кітап көрмесі

16 маусымда Абай атындағы кітапхананың тұрақты келушілері үшін қазақтың соңғы ханы Кенесары Қасымовтың туғанына 200 жыл толуына орай «Қазақ халқының ғасырлық тұлғасы» атты кітап көрмесі ұйымдастырылды. Оқырмандарға белгілі Кенесары Қасымовтың өмірбаяны, оның 1837-1847 жылдардағы қазақтардың тәуелсіздік жолындағы ұлт-азаттық қозғалысының жетекшісі ретіндегі қызметі туралы қызықты мәліметтер берілді.
Сондай-ақ, көрмеге келушілер Кенесары Қасымовтың істерді шариғат нормалары бойынша қарайтын билер сотын қалпына келтіргенін де білді. Кенесары өзінің салық саясатымен мұсылман құқығының нормаларын бекітті: малшылық аймақтар үшін – зекет (хан мен сұлтан пайдасына малшылардан алынатын салық), егіншілік аймақтары үшін – үшұр (отырықшы халықтан алынатын салық) сақтап қалды. Оқырмандар Кенесары ханның өте жақсы саясаткер болғанын және өзінің сыртқы саясатында Орта Азия хандықтарымен одақтастық және әскери қарым-қатынастар орнатқанын да білді.
Кітап көрмесінде Қ. Ахметовтың «Кенесары хан Ұлытау өңірінде», Е.Уәлихановтың «Кенесары», Ә.Кенесарыұлының «Кенесары және Сыздық сұлтандар», Т.Мекебаевтың «Кенесары-Наурызбай туралы тарих-фольклорлық үлгілер» және басқа да кітаптармен, сонымен қатар Кенесары хан туралы қызықты мәліметтерді қамтитын энциклопедиялар мен анықтамалықтар ұсынылды.