Кітаптардағы барлық даналық: әдеби экспозиция

Ұлы Абайдың туған күні қарсаңында Абай кітапханасында  9 тамыз күні қала қонақтары мен мәдениет мекемелерінің қызметкерлеріне  «Кітаптардағы даналықтар» атты әдеби экспозиция ұсынылды.

Кітапхана қонақтары әдеби экспозиция аясында «Ғасырлармен үндескен асыл қазына», «Абай әлемі – жауһар туындылар кітапханасы»,  «Ұлы даланың ұлы қаламгері» атты кітап көрмелерімен танысты.

Шара қонақтарына заманында Абай оқыған кітапхананың сирек басылымдар қорында күні бүгінге дейін сақталып келген ғұлама ақын пайдаланған,  XVIII ғасырдың соңы мен XX ғасырдың басында жария көрген құнды әдебиеттер ұсынылды. Сондай-ақ, кітапхананың тарихы, 1902 жылы ашылған Императорлық Орыс Географиялық Қоғамы Батыс Сібір бөлімінің Семей бөлімшесінің басылымдары және саяси жер аударылған орыс өлкетанушыларының еңбектері жайлы кеңінен мағлұмат алды. Ұлы ақын көңіліне жақын тұтып оқыған орыс және шетел классиктерінің шығармаларымен танысып, батыс Еуропа классиктері шығармаларының үздік үлгілері ұсынылды. Сонымен қатар, көрмеден орын алған Абай Құнанбайұлының Рақымжан Жаманқұлов пен Ықылас Адамбековтың редакторлығымен 1936 және 1939 жылдары баспа көрген латын қарпіндегі «Таңдамалы» өлеңдеріне қатысушылардың ықыласы зор болды.

Шара қонақтарына «Рухани жаңғыру бағдарламасы»  аясында жүзеге асырылған «Абай әлемі» жобасы бойынша жарық көрген 2018-2021  жылдары басылып шыққан кітаптар топтамасымен таныстырып, шолу жасалды. 1909 жылы жарияланған «Қазақтың ақыны Ибраһим Құнанбайұғлының өлеңі» кітабының  репринтті басылымы, 5 томдық таңдамалы «Абайтану» кітабы және 4 томдық «Абай және ақын шәкірттер мұрасы», Т. Жұртбайдың «Рух сұлтандары» мен Ф.М. Достоевскийдің «Семипалатинский период о жизни»,  Әміре Қашаубайұлы туралы естеліктер жинағы қатысушылардың ерекше қызығушылығын тудырды.

Қазақтың ұлы жазушысы, қоғам қайраткері, ғұлама ғалым,  Қазақстан ғылым академиясының академигі Мұхтар Омарханұлы Әуезовтің 125 жылдық мерейтойына орай  жазушының шығармашылығына арналған кітап көрмесіне шолу жасалды. Көрмедегі жазушының әр жылдарда жазылған шығармаларына, фотосуреттер және анықтамалық басылымдарға шолу жасалды. М.Әуезовтің «Абай жолы» романы, «Еңлік-Кебек» драмасы, «Қилы заман», «Қараш-қараш», «Қорғансыздың күні», «Барымта», «Көксерек», «Жетім», «Қараш-қараш оқиғалары», «Қаралы сұлу», «Қилы заман» сынды прозалық шығармалары жайлы ақпараттар берілді.

Әдеби экспозиция жыл соңына дейін қала қонақтары мен пайдаланушыларға ұсынылады.