Конституция заңдылық пен егемендіктің кепілі: экспресс-трибуна

27 тамыз күні Абай атындағы әмбебап кітапхана ҚР ІІМ Көліктегі ПД Семей станциясындағы желілік полиция бөлімі қызметкерлеріне Конституция күніне арналған «Конституция заңдылық пен егемендіктің кепілі» деген тақырыпта экспресс-трибуна ұйымдастырды.

Шара барысында кітапхана қызметкері Қазақ хандығы дәуірінен бастап Ата Заңымыздың қабылдануы мен даму тарихы, Тәуке ханның тұсында қабылданған «Жеті Жарғы», Конституция құрудағы Алаш қайраткерлерінің қосқан елеулі үлестері, Кеңес Одағының құрамында болған Қазақ АССР Конституциясының тарихы және қазіргі қолданыстағы тәуелсіз Қазақстанның Ата Заңы туралы баяндады.

Сондай-ақ тыңдаушылар назарына еліміз егемендік алғаннан кейін 1995 жылы 30 тамызда республикалық референдумда қабылданған Конституцияның тараулары мен баптары туралы, Ата Заңымызға осы күнге дейін енгізілген толықтырулар мен өзгертулер туралы кеңінен ақпарат берілді.

Шара соңында полиция қызметкерлеріне «Конституция басты құндылықтар бастауы» атты арнайы дайындалған кітап кқрмесіне шолу жасалды. Көрмеге қойылған С.З.Зимановтың 10 томдық «Қазақтың ата заңдары» үш тілдегі басылым, Е.Шаймерденовтың «Елтаным», Ө.Қопабаевтың «Ата заң – мемлекет дамуының іргетасы», М.Матаеваның «Конституционная история Казахстана и стран Центральной Азии» сияқты кітапхана қорындағы басылымдар шараға қатысушылар тарапынан ерекше қызығушылық тудырды.