Дәуірдің жарық жұлдызы: кітап көрмесі

5 қыркүйек күні Абай атындағы кітапханада  қоғам және мемлекет қайраткері, ақын, ғалым, тіл білімінің негізін салушы, Ахмет Байтұрсынұлының туғанына 150 жыл толуына орай «Дәуірдің жарық жұлдызы» тақырыбында   дарабоз дарын иесінің  қалдырған ұлы мұрасын насихаттауға бағытталған кітап көрмесі ұйымдастырылды.  Айта кетейік, Ахмет Байтұрсынұлының туған күні ресми түрде Қазақстан халықтарының тілдері күні болып белгіленген болатын.

Кітапханашы маман А. Байтұрсынұлының қазақ әдебиетіне сыншы, публицист, әдебиет тарихшысы, аудармашы және педагог ретінде қосқан  елеулі үлесін,  Абайдың ағартушылық және сыни дәстүрлерін жалғастыра және дамыта отырып, «Қазақтың бас ақыны» атты мақала жазып, қазақ әдебиетін жаңа деңгейге көтергендігі туралы ақпараттар беріп, өмірбаянынан деректер келтіріп, көрмеге шолу жасады.

Сонымен қатар Шығармашылық қызметін ол фабулист ретінде бастап, «Қырық мысал» «Маса» шығармаларында бос әурешілік, жалқаулық, надандық, көргенсіздік секілді адамның кемшіліктері мазақ етілетіндігі туралы да ақпараттар берілді.

Көрмеге кітапханамыздың қорын қамтитын  Ахмет Байтұрсынұлының  бес томдық шығармалар жинағы, «Тіл тағылымы», «Қырық мысал», «Маса», «Оқу құралы», «Әліппе кітабы», «Әдебиет танытқыш» туындылары,  А.Ә. Осман «Тіл тәуелсіздігі-Ел болашағы», Ә.Қайдар «Тіл ғұмыр», «Мемлекеттік тіл-ұлттық бірегейліктің негізі», Ахмет Байтұрсынұлы және қазақ филологиясы мәселелрі және т.б еңбектер  мен мерзімді басылым беттеріндегі тіл тақырыбына байланысты мақалалар қойылды.