Қазақстан – рухы биік ұлы өлке: кітап көрмесінің ашылуы

19 қазан күні облыстық Абай атындағы кітапханада Республика күніне орай  «Қазақстан – рухы биік ұлы өлке» атты кең көлемді кітап көрмесінің ашылу салтанаты өтті. Мәдени шараға жазушылар одағының Семей филиалының төрағасы М. Қарт, «Қазақ тілі» халықаларық қоғамының вице-президенті, Қазақстан халықтары ассамблеясының мүшесі О.Шәріп, «Жастар» орталығының өкілдері,  «Қайнар», Д. Қалматаев атындағы Семей медициналық колледжінің студенттері қатысты.

Көрменің мақсаты – Қазақстан Республикасының өткені мен болашағы туралы ақпараттар бере отырып, Отанға деген азаматтық, патриоттық сезімді қалыптастыру және отансүйгіштікке тәрбиелеу.

Кең  көлемді кітап көрмесіне «Қазақстан тәуелсіздігіне 10 жыл»,  «Қазақстан Республикасының мемлекеттік нышандары», «Қазақ хандары», «Қазақ мемлекеттілігінің тарихы», «Алаш қозғалысы», «Қазақстан тәуелсіздігінің қалыптасу тарихы», «Астана – Қазақстанның жүрегі», «Қазақстанның жеті кереметі», «ХХІ ғасырдың Астанасы», т.б. кітаптар, фотоальбомдар және өнер қайраткерлерінің суреттері қойылды.

Кітапхана мамандары мәдени шараға қатысушылардың назарына қазақ хандығының қалыптасу кезеңінен бастап, тәуелсіздік алғаннан кейінгі Қазақстанның дербес мемлекет ретінде даму тарихына және 30 жылдан аса уақытта жеткен әлеуметтік-экономикалық, мәдени дамуы, халықаралық қатынастардағы жетістіктеріне шолу жасап, ақпараттар берді.

Шара барысында О.Шәріп Республика болып белгіленген 25 қазан күні еліміздің ежелден ұмытылмас туған күні екенін айтып, туған күн қарсаңында туған елдің тарихы тұғырлы төрде тізбектелу керектігін жеткізсе, ақын М. Қарт бүгінгі егемен елдің ертеңі жалынды жастардың қолында екенін, жырмен суреттеп, соңынан ерген іні қарындастарына ағалық ақылын айтты.

Республика күніне орай ұйымдастырылған мәдени шара барысында Отан, туған жер, ерлік туралы әндер шырқалды.

Көрме ағымдағы жылдың 5 қарашасына дейін жалғасын табады.

Мерекелік шара ақын  Мерей  Қарттың  «Семей шаһары» өлең жолдарымен аяқталды.