Ертегілер еліне саяхат : онлайн кездесу

2023 жылдың 6 сәуірінде Абай атындағы кітапханада Могилев қаласының (Беларусь) облыстық жасөспірімдер кітапханасымен бірлескен түрде Халықаралық балалар кітабы күніне орай «Ертегілер еліне саяхат» тақырыбында онлайн кездесуі өтті.
Шара барысында қатысушылар бала тәрбиесіндегі ертегілердің мән-мағынасымен танысты. Ата-бабаларымыз өскелең ұрпаққа адамгершілік нормаларын, салт-дәстүрлері мен әдет-ғұрыптарын, өмірлік тәжірибесін, дүниеге көзқарасын ертегілер арқылы жеткізе білген. Ертегідегі кейіпкерлер жас балаға үлгі болды. Ертегімен сусындаған жас бала осы кейіпкерлер арқылы ненің дұрыс, ненің бұрыс екенінің ара-жігін ажыратып, оң қадам алды.
В.И.Ленин атындағы Могилев облыстық кітапханасы жастар бөлімінің меңгерушісі М.В. Елисеева әйгілі беларусь ертегілері бойынша әдеби шолу жасап, Могилев қаласының оқушылары Д. Васильев , Е. Полозкова, А.Ивашкова, С.Станкевич белорус ұлтының халық ертегілері «Заяц», «Курка-рабка» және т.б. ертегілерін ортаға салса, Д.Васильев кейіпкерлер образына ене отырып, белорус тілінде ертегі оқыды. Аталмыш шарада Семей қаласының 7-сынып оқушылары Е.Әшімова ,А. Мүталап, А. Щербакова қазақ халық ертегілері жайында баяндамалар жасап, қазақтың «Алдар-Көсе», « Самұрық», « Ер-Төстік» ертегілері кейіпкерлерінің есімдерінің шығу тарихын әңгімелеп, ертегінің жас балаларға берер тәрбиесінің мол екендігіне тоқталды.
Іс-шара соңында қатысушылар үшін сүйікті ертегілері бойынша викторина дайындалды. Онлайн кездесудегі екі жақтың оқушылары өздерінің сүйікті ертегілерін атап, таңдауларын түсіндірді. Кездесудегі Могилев және Семей қалаларының белсенді қатысушы оқушылары алғыс хаттармен және кітаптармен марапатталды.