Жұлдызым оңымнан туыпты: әдеби шығармашылық кеш

3 мамыр күні Абай атындағы әмбебап кітапханамызда Жеңіс күні мерекесіне орай кітапхананың байырғы оқырманы, Қазақстан Журналистер Одағының мүшесі, отставкадағы полковник Шаймардан Ахмарұлы Қалиакпаровпен әдеби шығармашылық кеш өтті.
Кеш себепкері Ш.Ахмарұлы Ұлы Отан соғысына қатысқан жауынгер Баженова ауылының тумасы, бірнеше рет ажалмен бетпе-бет келіп, ғажайып сәттіліктермен аман қалған Павел Молчановтың бастан кешкен шынайы оқиғалары негізінде «Крематорий Бухенвальда не принимает» кітабын жазған. Осы шығарма негізінде ауылдастары Садық ата мен Гүлжамила апаның соғыстан оралмаған қос ұлы Құлтай мен Жұмашқа әдебиеттегі ескерткіш Ш. Ахмарұлының қаламынан туған шағын драмалық шығарма «Жұлдызым оңымнан туыпты».
Шара барысында қаламыздағы М.Төлебаев атындағы музыкалық училище студенттері Ұлан Қаратаев, Рауан Күрентаев, Ғалымжан Дюсенғазин, Ерасыл Таев, Аружан Жұмабайқызы, Думан Абылқанов, Данияр Төкен және ұстазы Қамзин Болат Еркінбекұлының басшылығымен аталған шығармадан көрсетілген үзінді шара қонақтарын ерекше күйге түсірген әсерлі көрініс болды. Әдеби кездесуді аталған колледж студенттері Данияр Төкен мен Тұрсынғазы Досханның әндері әрледі.
Кітапхана қызметкерлері «Жұлдызым оңымнан туыпты» атты Ш.Қариакпаровтың шығармашылығына арналған әдебиеттер көрмесін ұйымдастырды. Кең көлемді көрмені сирек басылымдардан «1941-1945 жж. мерзімді басылымдар», «1941-1945 жж. жарыққа шыққан кітаптар» Ш.Қалиакпаровқа арналған слайд көрсетілімі шараға қатысушыларға ұсынылды.
Шаймардан ағаның әкесі Ахмар атамыз соғысқа қатысқан майдангер. Майдангердің баласы Ш.Ахмарұлының қаламынан 17 кітап жарыққа шықса, соның басым бөлігі қаһарман қазақ батырларына – Қажытай Шалабаев, Рақымжан Қошқарбаев, Талғат Бигельдинов, Сағдат Нұрмағанбетов, ауылдасы, батыр Айткеш Ибраевқа арналған. Ш.Қалиакпаров – А. Ибраевтың полкі туралы «Полк главного направления», сондай-ақ «Батыр анасының жүрек сыры» атты анасы Жамал апа жайлы, өзі білім алған геологоразведочный техникумның соғысқа қатысқан ұстаздары жайлы «Мобилизованные войной», майдангерлер туралы «Тағзым», «Побеждали с патриотизмом в сердце» және басқа да көптеген шығармалар авторы.
Қазақ елі туралы үлкен сүйіспеншілікпен жазған поляк ұлтының ерекше ұлы А.Янушкевичтің жайлы Ш.Ахмарұлының жазған «А.Янушкевичтің ізімен» кітабы поляк ғалымдарының зерттеу объектісіне айналды. Ш.Қалиакпаров Алаш арыстары, ұлт зиялылары туралы да көптеген мақалалар авторы. Әйгілі жерлесіміз Әзімбай Лекеров туралы «Первый экономист-профессор Азимбай Лекеров. Время и судьба» кітабы баспаға дайын, редакциялауда.
Шараға қатысқан қарапайым еңбек адамдары, ауылдастары сөз кезегін алып, туған ауылы Қызылқұйған және өздері жайлы жазылға екі томдық «Ауылым әрқашан есімде» кітабы, шағын ауылдың береке-бірлігі туралы әңгімелеп, келмеске кеткен бала кездерін еске алып, жастарға өнеге болар ғибратты әңгімелерін ортаға салды.
Шара соңында өнерлі жастар кітапхана тарапынан алғыс хатпен марапатталды.