Сахна менің өмірім: онлайн кездесу
2023 жылдың 8 маусымында Абай атындағы кітапхананың ұйымдастыруымен, ZOOM платформасында Абай облысының тумасы, ҚР еңбек сіңірген қайраткері, музыкалық драма және қуыршақ театр өнері кафедрасының меңгерушісі, доцент, Астана қаласындағы Қ.Қуанышбаев атындағы Мемлекеттік академиялық Қазақ музыкалық драма театрының актері Жанқалдыбек Муптиұлы Төленбаевпен «Сахна менің өмірім» атты онлайн кездесу өтті.
Шара барысында Жанқалдыбек Муптиұлы өзінің өнер жолына қалай келгендігі мен қазіргі шығармашылығы туралы айтып өтті. Актер театр сахнасында көптеген рөлдерді сомдаса да, көрермен қауымға Мұқағали образын сомдағанымен жақын таныс. «Мұқағали» драмасының авторы ақын Серік Тұрғынбеков: «Мен Мұқағали рөлін Жанқалдыбек Төленбаевқа арнап жаздым», – деген екен. «Мұқағали» драмасы 2003 жылдан бері жалпы 220 рет қойылған екен. Осы спектакльдердін бірінен кейін Фариза Оңғарсынова актерге өзінің ризашылығын білдіргені туралы айтып өтті. Сонымен қатар, актер «Мұқағали шындығы» деген деректі фильмге де түскен туралы әңгімелеп берді.
Шара қонағы берілген сұрақтарға толық қанды жауабын беріп, қатысушылардың ризашылығына ие болды.
