Дәстүрлі әннің дүлдүлі: онлайн кездесу

Маусым айының 7-ші жұлдызында Абай атындағы облыстық кітапханасының ұйымдастыруымен дәстүрлі әнші, ұстаз, ҚР еңбегі сіңген қайраткері Еркін Шүкімановпен онлайн кездесу өтті.
Кездесу барысында қазақтың дәстүрлі ән өнерінің бүгіні мен ертеңі жайында сөз қозғалды. Қонағымыз сөздің басын қазақ ән өнерін ғылым ретінде қарау керек деген пікірімен бастады. Эстрадалық ән мен дәстүрлі әннің арасы жер мен көктей, эстрада әлемдік музыка, ал дәстүрлі ән жалпы қазақтың болмысы, осы екеуінің ара жігін ажырата алуымыз керек деген ой түйді. Сол себепті қазақ әнін зерттеумен әншілер айналысу керек деген пікір қалдырды.
Сонымен қатар дәстүрлі Арқа мектебі, Жетісу мектебі, Сыр мектебі, Батыс мектебі және кенже тұрған Алтай, Тарбағатай мектебі жайында әңгіме өрбітті. Дәстүрлі әнші аталған мектептердің ерекшеліктеріне тоқталып, соның ішінде тарихтан белгілі Арқа мектебінің әндерінің кең тарағаны жайында сөз қозғады. Онлайн кездесу барысында қазақ әндерінің көп нұсқалылығы жайында, қазақ халқының музыкалық-этнографиялық қазынасы – А.Затаевичтің «1000 ән, 500 күй» атты жинағы туралы да айтылды.
Эфир соңында қонағымыз қатысушылардың қойған сұрақтарына жауап берді. Дәстүрлі ән өнеріне қатысты шара өте мазмұнды және тағылымы мол эфир болды.