Шығыстың дана ойшылы: кең көлемді кітап көрмесі

Жерлес ақын, жазушы, философ, тарихшы, композитор Шәкәрім Құдайбердіұлының туғанына 165 жыл толуына орай 11 шілде күні Абай атындағы кітапханада «Шығыстың дана ойшылы» кең көлемді кітап көрмесі ұйымдастырылды.
Шараға келушілердің назарына Шәкәрім Құдайбердіұлының шығармалары, ақын туралы жарыққа шыққан кітаптар және фотосуреттері ұсынылды. Атап айтсақ, «Абай әлемі» сериясымен жарық көрген кітаптары, Шәкәрімнің үш томдық шығармалар жинағы, екі томдық шығармалар жинағы, «Шәкәрім. Энциклопедиясы», «Шәкәрімтану мәселелері» ғылыми жинағы, Е. Сыдықовтың «Шәкәрім» кітабы және т.б. әдебиеттерге библиографиялық шолу жасалды.
Көрмеге келушілерді ақынның бұрын жоғалып кеткен және ұзақ жылдардан кейін табылған фотосуреттері ерекше қызықтырды.
Көрмеге қатысушылар Ш. Құдайбердіұлының өмірбаянымен танысып, Шәкәрімнің екі революциядан, азамат соғысынан аман қалғаны жайында ақпараттар алды. Ақын қуғын-сүргінге ұшырап, опасыздықпен өлтірілді, ал шығармалары жойылды. Тек 30 жылдан кейін ғана ақынның ұлы Ахат Құдайбердиев әкесінің соңғы қонысын тауып, сүйегін қайта жерледі. Ш. Құдайбердиевтің бейіті тәлімгер ұстазы – Абай бейітінің жанында орналасқан. Сөйтіп, ұлы Шәкәрім қажының есімі қайта оралып, қолжазбалары оқырмандар арасында жоғары сұранысқа ие болуда.