Бибігүл Карденова қонақта: шығармашылық кездесу

Абай облысы мәдениет, тілдерді дамыту және архив ісі басқармасы мен Абай атындағы кітапхана туған өлкеме тағзым жасаймын деп Семей қаласына арнайы атбасын бұрған Қазақстанның белгілі этнодизайнері Карденова Бибігүл Лаубайқызы мен қаламыздың қолөнер шеберлерінің басын қосып, шығармашылық кездесу ұйымдастырды.
Абай облысының мәдениет және халық шығармашылығы орталығының маманы Беделхан Қайсар модератор ретінде алғашқы сөзді «Айша бибі» қалалық қазақ мәдени орталығының басшысы А.И. Боқбасароваға берді. Кітапхана қызметкері жерлесіміз, болашақ этнодизайнердің туған әулеті, өскен ортасы, өмірінің басты кезеңдері мен шығармашылық жолы жайлы айтып, қысқа ақпаратпен қатысушыларды таныстырып өтті.
Б.Карденова өзі ұйымдастырған «Харекет» жеке білім мектебінде еңбек еткен ұлағатты ұстаз, «Пана» қайырымдылық қоры арқылы мүмкіндігі шектеулі жандарды қолөнерге баулыған, оларға жүрек жылуын сыйлай білген жан. Өзінің қолөнер «Urshyk» Республикалық Қоғамдық Бірлестігімен танымал болып, еліміздің үздік этнодизайнері ретінде 2023 жылы Парижде өткен Халықаралық көрмеде Қазақстанның көк байрағын желбіретіп, ұлттық құндылықтарымызды әлем халықтарына насихаттап жүрген қолөнер шебері.
Ұлттық этнодизайн әлемінде Карденова Бибігүл деген атымен, жасаған қолөнер туындыларымен танылып отырған шара кейіпкері Б. Лаубайқызы өз тарапынан өнермен өрілген өмірін қамтитын бейнебаянды қатысушылар назарына ұсынды. Шара қонақтары дизайнер Сәкен Назархан, шеберлер Камбышева Шұғыла, Өмірбаева Фарида қазақ қолөнері, ұлттық құндылықтарымыз жайлы ойларын ортаға салды. Қолөнерші шеберлер Сейілгүл Асқан мен Гүлмира Мұхамет-Қызырқызы шеберлік сыры жайлы пікір алмасты.
Б.Лаубайқызының ағасы Әділбай мырза мен апайы Жайнагүл ханым бұл киелі өнердің Бибігүлге әулеттен тарағанын, әкесі ағаштан, теріден, ал анасы жүннен ұлттық бұйымдар жасаған, ортасына танымал жандар болғанын жеткізді. Сөз кезегін алған достары Қайрат Жақанұлы мен Айгүл Айтбекқызы іскерлік қабілеттің Бибігүлдің бойында бала кезден қалыптасқанын, мектепте оқып жүріп-ақ бәрімізді басқарып, ұйымдастырып кететін еті тірі болды деп, балалық шағынан естеліктерімен бөлісті. Шараны қорытындылаған кітапхана маманынан Абайдың өлеңдер жинағын сыйға алған Б.Лаубайқызы өз алғысын білдірді.