Кітапханада балаларға арналған заманауи кеңістіктер ашылды: тұсаукесер

15 наурыз Қайырымдылық күні аясында Абай атындағы облыстық әмбебап кітапханасына «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust»  қоры қаржылай қолдау көрсетіп, «Кемелді қадам» қоғамдық қоры балаларға арналған заманауи кеңістіктердің салтанатты түрде ашылуына мұрындық болды. Салтанатты ашылуда Облыс әкімінің орынбасары Ә.Н.Мұсабаев қатысып, барша қатысушыларды бүгінгі тамаша күнмен құттықтап, демеушілерге үлкен алғысын білдірді.Сондай-ақ, «Кемелді қадам» ҚҚ төрайымы Г. Карменова сөз алып, аталмыш қоғамдық қордың әлі де талай жобаларды мақсаттарына жеткізуге мүмкіндіктері бар екендігін білдірсе, белгілі ақын Т.Әбдікәкімұлы бала жастан кітапты көп оқуға шақырып, демеушілерге өз алғысын айтты.

Балаларға арналған кеңістіктер заманауи үстел, орындықтар, сурет салатын ыңғайлы мольберттер, кітап сөрелері мен жұмсақ жиһаздар,  арнайы кітап сөрелері,  ноутбуктер, проектормен жабдықталса, инновациялық робототехника зертханасы компьютерлермен, ноутбуктермен, проектор, сканер, 3D-принтер, робот, конструктор сынды робототехниканы үйренуге арналған жинақтар, интерактивті үстелдермен қамтамасыз етілді.

Іс-шараға қала мектептерінің оқушылары, ата-аналар қатысып, үлкен қуаныштарын білдірді. Ұлыстың ұлы күні қарсаңында табысталып жатқан қоғамдық орын ел игілігіне ұсталып, жұмысымыз алға баса берсін!

Игі бастамаға мұрындық болған «Samruk-Kazyna Trust» қорына және «Кемелді қадам» қоғамдық қорына зор алғысымызды  білдіреміз!