Армысың, Әз Наурыз!: әдеби – мәдени тойлау

Наурыз мейрамын тойлау мақсатында  Абай атындағы кітапхана   Қ.Мұхаметханұлы көшесі бойындағы, ашық алаңда алғаш рет қазақ үй жабдықтады. Киіз үйді қаламыздағы № 47 мектеп ұжымы тікті. Тігілген киіз үй – танымал жазушы Б.Соқпақбаевтың  туғанына 100 жыл толуына орай «Бердібек Соқпақбаев» ауылы деп аталды.

Кітапхана ұжымы аталмыш ақ шаңқай қазақ үйді  ұлтымыздың  салт-дәстүрі бойынша безендіріп, келушілерді ізгі тілекпен қарсы алды. Абай кітапханасы, Бердібек ауылының шаңырағына «Фолиант» баспасының директоры Нұрлан Исабеков, ақын, филология ғылымдарының докторы,профессор,Қазақстан Жазушылар одағы Басқарма Төрағасының орынбасары, Халықаралық «Алаш» сыйлығының лауреаты Бауыржан Жақып, ҚР Мемлекеттік сыйлықтың лауреаты, Жазушылар Одағының мүшесі, Т.Айбергенов атындағы сыйлықтың лауреаты Тыныштықбек Әбдікәкімұлы, Халықаралық «Алаш» әдеби сыйлығының иегері, Дарын Мемлекеттік жастар сыйлығының  лауреаты, Қазақстан Жазушылар одағы Астана қалалық филиалының төрағасы Дәулеткерей Кәпұлы, сондай-ақ, белгілі әнші, мәдениет қайраткері, сазгер, сатирик – Аймұхамбет Бейсембеков және т.б. ел ағалары арнайы ат басын тіреп, Наурыз мейрамымен құттықтап,кітапхана ұжымына ақ жарма тілектерін жеткізді.

Келген қонақтарды жазушының өмірі мен шығармашылығынан сыр шертетін «Қазақ әдебиетінің бәйтерегі» тақырыбындағы кітап көрмесі қарсы алды.Көрмеге жазушының әр жылдарда жарық көрген еңбектері орналастырылып, қанатты сөздері жайғастырылды.

«Бердібек Соқпақбаев» ауылының қонақтарын ARAI EAST FOOD ұжымы дәм-тұзбен қарсы алып, қонақжайлылық танытты. Сондай-ақ, бұл ауылда қыз ұзатылып, сырға салынып,құдаласу рәсімі көпшіліктің назарына ұсынылды.