Абайды оқы, таңырқа: кең көлемді кітап көрмесі

10 тамыз күні Абай атындағы кітапханада қазақтың бас ақыны А. Құнанбайұлының туған күніне орай «Абайды оқы, таңырқа» атты тақырыпта кең көлемді кітап көрмесі ұйымдастырылды.
Кіапхана қызметкерлері Абайдың өмір жолы, шығармашылығымен таныстыра отырып, «Абай шығармаларының академиялық жинағының 3 томдығы», «Абай және ақын шәкірттер мұрасы», «Абай дәстүрі және қазіргі қазақ әдебиеті» кітаптары, Абай шығармаларының репринттік басылымы жайында кеңінен баяндап, Абайдың ақын шәкірттері жайында, кітапхана қорында бар ақын кітаптарына тоқталып өтті.
Кітап көрмесіндегі «Абай шығармалары», «Абайтану». «Абайдың ақындық дәстүрі», «Абай және ұлы тұлғалар шығармашылығының сабақтастығы», «Абай жолы», Абай әлемі» сериясы деп аталатын бөлімдерге Абайдың өмірі мен шығармашылығы, еңбектері мен танымал тұлғалардың ақын туралы жазылған еңбектері, Абайдың ақын шәкірттері, ұлы тұлғалармен шығармашылығының сабақтастығы туралы кітаптар қойылды.
«Абай шығармалары» деп аталатын бөлімде Абайдың өлеңдері,қара сөздері, поэмалары қойылса, «Абайтану» бөліміне абайтанушы ғалым М. Мырзахметұлы дайындаған «Абайтану» сериясының 10 томдығы, Әл-Фараби атындағы Қазақ Ұлттық Университеті дайындаған «Абайтану» көптомдық еңбектері, «Абай әлемі» сериясымен жарияланған бес томдық еңбектер қойылды. Бұл бөлімге қойылған кітаптар қатарын Б. Ердембековтің «Абайтану» оқу құралы, А. Омаровтың «Бүгінгі абайтану» монографиялық еңбектері толықтырды.
Кітапхана қызметкерлері, бұл бөлімге қойылған құнды еңбектердің қатарындағы Ә.Бөкейхан жазған тұңғыш некролог, А. Байтұрсынұлы жазған «Қазақтың бас ақыны» мақаласы, К.Ысқақұлы жазған Абай Құнанбайұлы өмірі деп аталатын мақалалары жайында атап өтті.
«Абайдың ақындық дәстүрі» бөліміне «Абай және ақын шәкірттер мұрасы» таңдамалы еңбектің төрт томдығы, «Абайдың ақындық мектебі», «Абайдың ақындық дәстүрі және Шәкәрім поэмалары», Қ.Мұхамедханұлының «Абайдың ақын шәкірттері». К. Жанатайұлы, Ә. Тәңірбергеновтің кітаптары қойылды.
«Абай және ұлы тұлғалар шығармашылығының сабақтастығы» бөлімін А.Машанов «Әл-Фараби және Абай», М.Мырзахметұлы «Абай және шығыс», «Гете и Абай», «Пушкин и Абай» т.б. кітаптар толықтырды.
«Абай жолы», Абай әлемі» сериясы бөлімінде «Абай әлемі», «Абай жолы» кітаптар сериясымен шыққан барлық еңбектері ұсынылды.
Кітапхананың барша оқырмандарының тамыз айының соңына дейін кең көлемді кітап көрмесімен танысуға мүмкіншіліктері бар.