Театр – ұлт рухының жаршысы: көрме

Абай атындағы қазақ музыкалық драма театры – бүкіл қазақ театры өнерінің қарашаңырағы. Еліміздегі тарихы бай, дәстүрі қалыптасқан өнер ордасы.

Қараша айының 29-шы жұлдызында Абай атындағы қазақ музыкалық – драма театрының 90 жылдығына орай, Абай кітапханасы қызметкерлері «Театр – ұлт рухының жаршысы» тақырыбында  көрме жасақтап, көпшілікке назарына ұсынды. Мерейтойлық шара барысында атаулы кітап көрмесінің таныстырылымы өткізілді. Кітап көрмесін облыс әкімі және қала қонақтары тамашалады.

Абай атындағы музыкалық – драма театры Қазақстан өнер тарихында өзіндік айтулы өнер ошағы екені елге мәлім. Театр 90 жылдың ішінде өнер сүйген қауымға тарихи сырларымен қадірлі де құрметті.

Айтулы кітап көрмесіне Абай кітапханасының қорынан мерзімді басылымдар бетіндегі мақалалар, театр жайлы көптеген кітаптар мен театр тарландарымен өткен газет бетіндегі сұхбаттар қойылды. Тоқтала кететін болсақ мерзімді басылымдар беттеріндегі «Театр тарландарына құрмет көрсетілді», «Өнердің қара шаңырағы», «Семей театры өрледі» сынды мақалалары, сонымен қатар біраз жыл театр басшысы болған Отантай Кәрібжановтың «Өмір өрнектері», Жұмабек Қамбаровтың Абай театрын құруға ат салысқан тұлғалар туралы жазылған «Сан сырлы сахна» сынды кітаптары көрмемізде көрініс тапты. Айтылған кітаптар мен мерзімді басылымдармен қатар басқа да, театрдың құрылу тарихын, жүріп өткен жолын айқындайтын, театрға бар ықыласын сала отыра қызмет еткен тұлғалар жайлы да кітаптар мен газеттер  таныстырылды. Көрмені тамашалауға келген көрермендерімізге кең көлемді таныстырылым болып, Абай театры жайында ақпараттар берілді.

Мәдени шарада театр қабырғасында қызмет істеп, театрдың дамуына ат салысқан айтулы тұлғалар бой көрсетті.

Тоқсан жылдық тарихы бар Семей музыкалық – драма театры шалғайда тұрып-ақ үнін шартарапқа жеткізген өнер шаңырағы!