Тарихы терең театр: кітап тұсаукесері

25 желтоқсан күні Абай кітапханасында Абай атындағы Семей мемлекеттік қазақ музыкалық драма театрының шаңырағына 90 жыл толуына арнайы шығарылған «Тарихы терең театр» атты кітаптың тұсаукесері болып өтті.
Өнер сүйер қауым мен көпшілік оқырманға арналған «Тарихы терең театр» кітабында театр тарихындағы алар орны ерекше аға буынның жылы естеліктері, жастардың жаңалыққа толы қадамдары, сұхбаттар, мақалалар топтастырылған.
Шараға кітап авторы Абай атындағы қазақ музыкалық драма театрының басшысы, Мәдениет саласының үздігі Ербол Жуасбек, сондай-ақ, осы театрдың әртістері ҚР Мәдениет қайраткері Мырзахан Сыдықов, ҚР Мәдениет қайраткері Бақыт Тойымбаева, ҚР Мәдениет қайраткері Айжан Манекина, ҚР Мәдениет қайраткері Шолпан Мұханбетова және ҚР Мәдениет саласының үздігі Әсел Нұрланова, Еңлік Саматовалар арнайы қонақ болып келді.
Іс – шарада кітап авторы Ербол Жуасбек «Тарихы терең театр» кітабының жазылу тарихыны тоқталып, жазу барысындағы ізденістер мен қиындықтарға тоқтала отырып, 90 жылдық тарихы бар театрдың тарих толқынындағы мазмұндылығы жайында әңгіме өрбітті. Кітаптың мазмұнына тоқталып, уақыт кезеңдерінен сыр шертті.
Жас актрисалар Ә. Нұрланова , Е. Саматовалар кітап жайында өз ойларын айтып, жазылу барысында қосқан үлестерін ортаға салып, театрға деген ыстық сезімдерін жеткізсе, театр тарландары М. Сыдықов, Б. Тойымбаева, А. Манекина, Ш. Мұханбетовалар өнер жолының қыр-сырына тоқталып, жұмыс барысында бастан кешкен қызықты оқиғалардан сыр шертті.
Кездесуге қатысушы көрермендер көкейлеріндегі сауалдарын қонақтарға жолдап, жауаптар алды.
Шара соңында театр ұжымы Абай атындағы кітапхана шаңырағына үлкен алғыс білдіріп, шығармашылық табыс тіледі.