Абай даналығы – ұлттық рухтың тұғыры: кең көлемді кітап көрмесі

Биыл қазақ поэзиясының биік шыңы, ақын, сазгер, ойшыл Абай Құнанбайұлының 180 жылдық мерейтойы. Абай сөзі – асыл сөз. Абай сөзі – адамды адалдыққа адастырмай апаратын, білім мен ғылымға бастайтын даналық.
Кемеңгер ақынның мерейтойына арнайы мерекелеу шарасы жер-жерлерде басталып та кетті.
Осының бір айғағы 5 ақпан күні Абай кітапханасының мамандары Абай театрында өткен мерекелік шара барысында қала қонақтары мен тұрғындары назарына ақынның шығармашылық мұрасынан мол мағлұмат беретін «Абай даналығы – ұлттық рухтың тұғыры» атты кең көлемді кітап көрмесін ұсынды. Көрмеде кітапхана қорындағы ақын шығармашылығы мен өмірінен сыр шертетін фотосуреттер мен М.Мырзахметұлының «Абайдың «Толық адам» ілімі» кітабы, «Әлемнің Абайы қазақтың дана Абайы», Ғ.Есімовтің «Хакім Абай», «Абай шығармалары», «Абайтану», «Абайдың ақындық дәстүрі», «Абай және ұлы тұлғалар шығармашылығының сабақтастығы», «Абай жолы» роман эпопеясы, «Абай және ақын шәкірттер мұрасы» таңдамалы еңбектің төрт томдығы, «Абайдың ақындық мектебі», «Абайдың ақындық дәстүрі және Шәкәрім поэмалары», Қ.Мұхамедханұлының «Абайдың ақын шәкірттері». К. Жанатайұлы, Ә. Тәңірбергеновтің кітаптары және 2023-2024 жж. «Абай жолы» кітапханасы топтамасымен жарыққа шыққан туындыларына шолу жасалды.
Мәдени-рухани және танымдық шара аясында ұйымдастырылған ұлы Абайға арналған кең көлемді кітап көрмесінің көрермені де көп болып, Абай ілімі жайында жазылған әдебиеттерге зор қызығушылық танытты.