Қаһарлы жылдар баспа беттерінде: сирек мерзімді басылым және кітаптар көрмесі
6 мамыр күні Абай кітапханасында Жеңістің 80 жылдығына арналған «Қаһарлы жылдар баспа беттерінде» атты мерзімді басылым және кітаптар көрмесіне шолу жасалды.
Шараға ҚР ІІМ ҚАЖД-нің «№ 20 мекемесі» РММ – ның қызметкерлер қатысты.
Көрмеге кітапхана қорындағы 1941-1945 жылдары жарық көрген: «Екпінді», «Социалистік Қазақстан», «Прииртышская правда», «Правда», «Казахстанская правда», «Учительская газета», «Большевик Казахстана», «Большевик», «Здравоохранение Казахстана», «Халық мұғалімі», «Қазақстан Коммунисі», «Народное хозяйтво Казахстана», «Красный библиотекар», «Қазақстан большевигі», «Исторический журнал» т.б. мерзімді басылымдар және Н. Баймұратовтың «Ер Төлеген» 1945ж., «Дәстүр» 1943 ж., Д. Әлімбаевтың «Толғау» 1941ж., «Письма с фронта» 1944 г., «Жауынгер хаттары» 1968 ж., «Герои Советского Союза Казахстанцы» 1945 ж. Ғ. Мүсіреповтің «Козы Корпеш и Баян слу» 1945 г., Х. Хайдарованың «Чокан Валиханов» 1945 г., Ғ. Бегалиевтің «Жаңа алфавит» 1941 ж. т.б. сұрапыл соғыс жылдарында баспадан шыққан кітаптар қойылды.
Шолуда Ұлы Oтaн соғысының отты жылдарындағы қиындыққа қарамастан Семейдің облыстық Н.В. Гоголь атындағы (1992 ж. бері Абай есімі берілген) кітапханасы оқырмандар үшін қызмет етіп, еліміздің бейбіт өмірге жетуіне өз үлестерін қосқаны, кітапхана қоры сол жылдарда да толықтырылып отырғаны, кітапханашылардың қорын сақтап, Кеңес информбюросының мәліметтерін насихаттау мақсатында іс-шаралар үнемі өткізіліп тұрғандығы жайында баяндалды.
Қаһарлы күндердегі мерзімді басылым беттерінде жарияланған майдандағы жауынгерлердің ерліктері, елдегі халықтың еңбектері мен жетістіктері, күнделікті тыныс-тіршілігі, даңқты балуан, қара күштің иесі Қажымұқан Мұңайтпасовтың қаржысына жасалған ұшақтың Семейлік жерлесіміз Қажытай Шалабаевтың үлесіне тигені және «Письма с фронта», «Жауынгер хаттары» жинақтарындағы хаттарға қонақтардың ерекше назарлары ауды.
Қаһарлы жылдардағы басылым беттерімен танысқан шара қонақтары алған әсерлерімен өздерінің ризашылықтарын айтып тарқасты.