«Адамзаттың бәрін сүй бауырым деп…»: дүниежүзі поэзия фестивалінің жалғасы

«Адамзаттың бәрін сүй бауырым деп …» тақырыбындағы дүниежүзі поэзия фестивалі өз жалғасын Бейбітшілік аралындағы Этноауылда жалғастырды. Бірнеше күннен Абай елінде қонақта болып, Абай даналығын халықпен ұлықтап жүрген шетелдік шайырлар бұл күнді қарт Ертісте серуендеуде бастап, «Ертіс толқынында» поэзия сағатымен бастады.

Барша жиылған қауымға Бейбітшілік аралында орын тепкен, өңірдің «заман ай» үнінен сыр шертетін «Өлімнен де күшті» белгісі мен «Бейбітшілік» стелласы сияқты мәдени ескерткіштерге таныстыру жүргізіліп, «Өлімнен де күшті» ескерткішіне гүл шоқтары қойылды. «Қолөнер – бабадан қалған мұра» атты қолөнер шеберлерінің жәрмеңкесі ұсынылды.

Семей өнерпаздарының қатысуымен, Мемлекеттік сыйлықтың иегері Есдәулет Ұлықбек Оразбайұлының жетекшілігімен  «Жыр арнаймын жүрегімнен» атты поэтикалық сазды сағат өз жалғасын айшықтай түсті. Шара аясында «Адамзаттың бәрін сүй бауырым деп» атты дүниежүзілік поэзия антологиясының (қазақ және ағылшын тілдерінде) тұсаукесер рәсімі жасалды. Заманауи VR көзілдірігі арқылы Абай еліне онлайн саяхат та ұйымдастырылды.

Жиналған барша қауымға  Абай кітапханасының сирек қорындағы әлем жауһарларынан жасақталған  «Ғасырлармен үндескен асыл қазына» тақырыбындағы  әдеби экспозиция таныстырылып,  шетелдік және қазақстандық ақындырдың тәжірибе алмасу сағаты «Өлең  – сөздің патшасы…» болып өрби түсті. Сондай-ақ, шарада  қатысушыларға әр мәртеде мараппатар табысталып, Михай Эминеску атындағы Халықаралық поэзия академиясының төсбелгілері тағылды.

Аталмыш ауқымды шара соңында шараға келуші шетелдік қонақтар Абай елінен алған ерекше әсерлерімен бөлісіп,  Абай даналығының куәсі болғандықтарын жеткізді.