Ата заң: тарихтан тағылым, болашаққа бағдар: кітап көрмесі

29 тамыз күні Абай кітапханасының ұйымдастыруымен Абай атындағы қазақ музыкалық драма театрында Қазақстан Республикасының Конституциясының 30 жылдығына орай «Ата заң: тарихтан тағылым, болашаққа бағдар» атты кітап көрмесі жасақталды.
Көрмеде қазақ халқының құқықтық жүйесінің тарихи бастауларынан бастап, бүгінгі тәуелсіз Қазақстанның Конституциясына дейінгі маңызды деректер мен еңбектер ұсынылды. «Ата заң – өркениетке апарар жол» бөлімінде қазақ тарихындағы дәстүрлі құқықтық жүйені айқындайтын деректер қойылды. Олардың қатарында: «Қасым ханның қасқа жолы», «Есім ханның ескі жолы», «Тәуке ханның «Жеті жарғысы» туралы зерттеулер, Шоқан Уәлихановтың қазақ қоғамындағы сот реформаларына байланысты жазбалары, Абай Құнанбайұлы шығармашылығындағы әділет пен заң, билік туралы ой-тұжырымдарын талдайтын еңбектер, Қазақтың дәстүрлі құқықтық мәдениетіне арналған зерттеулер мен жинақтар таныстырылды.
«Ата заң – тәуелсіздіктің нық тірегі» бөлімінде Қазақстан Республикасының конституциялық дамуына қатысты еңбектер қойылды.
Көрме материалдары оқырмандарға Ата заңның тарихи бастауларын, тәуелсіздік жылдарындағы құқықтық жетістіктерді және Конституцияның қоғамдағы орны мен болашаққа бағыт берудегі маңызын кеңінен таныстыруға мүмкіндік береді.