Тарихи жол айрығы – дәуірлер тоғысында: өлкетану қонақжайы

21 қыркүйек күні Абай кітапханасы мен «Ертіс өңірі» өлкетану қоғамының ұйымдастыруымен кітапхана пайдаланушылары мен қала тұрғындарына арналған «Тарихи жол айрығы – дәуірлер тоғысында» атты өлкетану семинары өтті.

Қала күніне орай ұйымдастырылған бұл өлкетану қонақжайы семейліктерге сүйікті қалаларының тарихи деректерімен жақынырақ танысуға мүмкіндік берді. Тұрғындар Әсет Найманбаев пен Бауыржан Момышұлы көшелерінің қиылысындағы сәулетті көше көрінісін жоғары бағалап, ерекше әсер алды. Өлкетанушылармен өткен кездесуде бұл тарихи жол айрығының бізге дейін өмір сүрген адамдардың тұрмысын, мәдениетін, қоғам өмірін айғақтайтын маңызды нүкте екені атап өтілді.

Қатысушыларға төрт тарихи ғимарат таныстырылды:

– Зергер Шульцтің үйі (1898 жылы салынған);

– Өндіруші Н.М. Бардыгинге тиесілі «Еңбек» үйі (1916);

– Мамандар үйі (1932–1938);

– Құм-әк кірпіштен салынған көпқабатты тұрғын үй (1980), онда Семейдің танымал дәрігерлері, мұғалімдері және басқа да көрнекті тұлғалар тұрған.

Өлкетанушылар сипаттаған бұл ғимараттар еліміздің әр кезеңіндегі – капитализм, революция, социалистік құрылыс, социализмнің аяқталуы мен қайта құру дәуірлеріндегі – тарихи даму кезеңдерін бейнелейді. Ғимараттардың тарихи контекстіне сай орнатылған мүсіндік композициялар сол дәуірдің рухын сезінуге мүмкіндік берді. Семинар барысында қатысушылар тарихи қиылыстағы мүсіндік туындылардың авторы, суретші Нұрбол Қалиевпен кездесті. Қонақтар мүсіндердің жасалу барысына қатысты түрлі сұрақтар қойып, автордан толыққанды жауап алды.

Сонымен қатар, шара аясында Қазақстан қалаларының тарихи дамуына шолу жасайтын кітап көрмесі ұйымдастырылды. Көрмеде әрбір қаланың өзіндік сәулеті мен тарихи өткені арқылы ерекшеленетіні көрсетілді.

Іс-шараға қала тұрғындары мен Электротехникалық колледж жанындағы «Ұлы Дала» клубының студенттері белсене қатысты.