Адам – керуен, өмір – жол: кітап тұсаукесері

25 қыркүйек күні Абай кітапханасында өткен «Kitap Time – 2025» жалпы республикалық кітап фестивалі аясында «Құрметті теміржолшы» төсбелгісінің иегері Мақсұт Қошжанның «Адам – керуен, өмір – жол» атты жаңа кітабының тұсаукесері өтті. Бұл туынды – өмір жолын парасатпен жүріп өткен, елге еңбегі сіңген азаматтың тағылымды тағдыры мен өмірлік тәжірибесінің көрінісі.
Шара шымылдығы дәстүрлі өнермен ашылып, Әміре Қашаубаев атындағы облыстық филармониясының әншісі Бақытжан Түлкібаевтың орындауындағы халық әні кешке рухани әр берді. Кітаптың тұсаукесер рәсімінде лентаны қию құрметі Абай облыстық ардагерлер кеңесінің төрағасы Мұрат Әлин мен «Абай Құнанбаев» қоғамдық қорының басшысы Отантай Кәрібжановқа ұсынылды. Салтанатты шара барысында зиялы қауым өкілдері мен қонақтар сөз сөйлеп, авторға ақжарма тілектерін арнады. Олар кітаптың тәрбиелік, тағылымдық мәніне тоқталып, бүгінгі ұрпаққа берер рухани азығы мол екенін атап өтті.
Жиын барысында Мақсұт Қошжан өз еңбегін Абай облысының мәдениет, тілдерді дамыту және архив ісі басқармасы басшысының орынбасары Олжас Соғымбайға тарту етіп, шынайы ризашылығын білдірді.
Шараға Семей қаласының электротехникалық колледжі мен Семей медициналық колледжінің студенттері де қатысып, рухани кездесуден үлкен әсер алды. Жастардың өмірлік тәжірибеге құрылған естеліктер мен шынайы тағдырлардан құралған шығармамен танысуы – олардың сана көкжиегін кеңейтетіні сөзсіз.