Ж. Аймауытов «Ақбілек»: оқырмандар конференциясы
8 қазан күні Абай кітапханасында қазақ әдебиетінің көрнекті өкілі, жазушы, драматург Жүсіпбек Аймауытұлының «Ақбілек» романына арналған оқырмандар конференциясы өтті. Іс-шара «100 кітап» ұлттық сауалнамасының қорытындысы аясында ұйымдастырылды. Аталған сауалнама нәтижесі бойынша «Ақбілек» романы үздік жүз шығарманың ішінде төртінші орынға ие болған. Бұл – қазақ оқырманының рухани талғамының биіктігін және ұлттық әдеби мұраға деген құрметін айқындайды.
Конференцияға Семей қаласының М.О.Әуезов атындағы педагогикалық колледжінің химия және биология пәндерінің оқытушысы Лаура Құспанова және колледж студенттері қатысты. Шара барысында Қажыкенова Дильназ бен Биғазина Ұлжан «Жүсіпбек Аймауытұлының көркем әлемі» атты баяндама жасаса, Избастина Дамира мен Нұрланқызы Назия «Ақбілек – қазақ қоғамындағы жаңарудың символы» атты баяндама дайындап романның көркемдік ерекшелігі мен әйел бейнесін терең талдады. Сонымен қатар, қатысушылар романдағы басты кейіпкердің рухани өсу жолы, еркіндік пен адамгершілік мәселелері жөнінде өз ойларын ортаға салды.
Конференция соңында Абай кітапханасы атынан колледж оқытушысы Лаура Ұзақбайқызы мен белсенді студенттерге алғыс хаттар табыс етіліп, олардың әдебиетке деген қызығушылығы мен белсенділігі атап өтілді.
