Бауыржан Момышұлы «Ұшқан ұя»: интеллектуалды ойын

20 қараша күні Абай кітапханасының балалар әдебиеті бөлімінде Бауыржан Момышұлының «Ұшқан ұя» шығармасына арналған интеллектуалды ойын өткізілді. Іс-шара «100 кітап» ұлттық сауалнамасының қорытындысы аясында ұйымдастырылды.
Шараға Семей қаласының Төлеубай Аманов атындағы №16 жалпы орта білім беретін мектебінің 8-сынып оқушылары қатысып, батырдың өмір жолы мен шығармашылығы туралы білімдерін ортаға салды.
Ойын кезінде қатысушылар «Ұшқан ұя» шығармасындағы отбасылық құндылықтар, ұлттық тәрбие, ерлік пен адамгершілік тақырыптарын талқылап, түрлі сұрақтар мен тапсырмалар арқылы өз ой-пікірлерін білдірді.
Шараның мақсаты – оқушылардың Бауыржан Момышұлының өмірі мен ерлігін танып-білуіне, патриоттық сезімін және зияткерлік қабілеттерін дамытуға ықпал ету.
«Wordwall» платформасында оқушыларға арналған викториналық сұрақтар ұсынылды. Ал «Educaplay» платформасында оқушылардың мәтінді қаншалықты меңгергенін анықтайтын тапсырмалар орындалды. Сондай-ақ, мәтіннен алынған үзінділердің тәрбиелік мәнін талдау жұмыстары жүргізілді. Осы тапсырмалар арқылы оқушылар шығарма мазмұнын тереңірек түсініп, өз пікірлерін білдірді. Сонымен қатар, Бауыржан Момышұлының өмірі мен шығармашылығына арналған «Бауыржан Момышұлы мұрасы – ұрпаққа өнеге» атты кітап көрмесі жасақталды.
Белсенді оқушылар алғыс хаттармен марапатталып, қатысушыларға «Ұшқан ұя» шығармасын оқу арқылы рухани және адамгершілік құндылықтарды бойға сіңірудің маңыздылығы атап өтілді.