ШЫРАЙЛЫ ШЫМҚАЛАДАН – ШҰҒЫЛАЛЫ ШЫҒЫСҚА: шығармашылық кездесу

29 қараша күні Абай кітапханасында Шымкент қаласының Мәдениет және өнер күндері аясында «ШЫРАЙЛЫ ШЫМҚАЛАДАН – ШҰҒЫЛАЛЫ ШЫҒЫСҚА» атты әдебиет зерттеушісі, филология ғылымдарының докторы, профессор Кұлбек Ергөбек және филология ғылымдарының кандидаты, абайтанушы ғалым Ақжол Қалшабекпен мазмұнды шығармашылық кездесу өтті. Шараның модераторы – Шымкент қаласының Әл-Фараби атындағы қалалық ғылыми-әмбебап кітапханасының директоры, ф.ғ.к., айтыскер ақын Анар Жаппарқұлова.
Кездесудің басты мақсаты – қос қаланың мәдени ынтымақтастығын арттырып, әдеби орта өкілдерінің тәжірибе алмасуына мүмкіндік жасау, сондай-ақ Шымкенттің тарихи-мәдени мұрасын насихаттап, оның бай әдеби әлемін оқырманға кеңінен таныстыру.
Шараның шымылдығы айтыскер ақын, Әл-Фараби атындағы қалалық ғылыми-әмбебап кітапханасының қызметкері, халықаралық және республикалық айтыстардың жеңімпазы Мейіржан Жақыптың арнау жырымен түрілді. Кездесу барысында Құлбек Ергөбек пен Ақжол Қалшабек сөз сөйлеп, Ақжол Қалшабек «Абай» атты жаңа кітабын оқырман қауымға таныстырды.
Шараның сәнін «Шымкент концерт» ұйымының талантты әншілері – Руслан Ақынбеков пен Тұрар Әлменов, сондай-ақ Абай елінің дәстүрлі әншісі Айдан Бауыржанұлы әнмен аша түсті. Кездесу барысында Шәкәрім университетінің Қазақ филологиясы кафедрасының аға оқытушысы, PhD докторы Қарлығаш Әубәкірова да сөз алып, шығармашылық байланыстың маңызын атап өтті. Сонымен қатар, оқырмандар назарына «Шымкент – көне қала» атты кеңейтілген кітап көрмесі ұсынылды.
Кеш соңында Абай кітапханасының директоры Мерей Қарт сөз алып, Шымкент қаласының қаламгерлеріне кітап тарту етті. Өз кезегінде Шымкент қаласының Әл-Фараби атындағы қалалық ғылыми-әмбебап кітапханасының директоры Анар Жаппарқұлова да Абай кітапханасына кітап сыйға тартты.
Сондай-ақ, қаламгерлер мен оқырмандар еркін форматтағы сыр-сұхбат арқылы пікір алмасып, зор рухани әсерге бөленді.