Ұлт рухының жыршысы – Несіпбек Айтұлы: сұхбат алаңы

30 қараша күні Абай кітапханасында қазақтың көрнекті ақыны, Мемлекеттік сыйлықтың лауреаты, Қазақстанның еңбек сіңірген қайраткері, «Парасат» және «III дәрежелі Барыс» ордендерінің иегері Несіпбек Айтұлының туғанына 75 жыл толуына орай «Ұлт рухының жыршысы – Несіпбек Айтұлы» тақырыбында сұхбат алаңы өтті.
Іс-шараға ақынның жары мен ұрпақтары, белгілі жазушы, ф.ғ.д., абайтанушы, әуезовтанушы, алаштанушы Тұрсын Жұртбай, композитор, дәулескер күйші, Қазақстанның еңбек сіңірген әртісі, Парасат және Құрмет ордендерінің иегері Секен Тұрысбеков, Аягөз ауданы әкімінің орынбасары Айбек Нұғымаров, ақынның жерлесі Нұрланбек Тоқтабаев, Абай облысының мәдениет, тілдерді дамыту және архив ісі басқармасының басшысы Жанжігіт Омархан және ақынның көзін көрген замандастары мен зиялы қауым өкілдері қатысып, ақынның өмірі мен шығармашылығы туралы кеңінен әңгіме өрбітті.
Кездесуге ақынның туған жері Аягөз ауданы, Баршатас ауылынан арнайы делегациясы келіп, көрнекті тұлғаның өнегелі өмірі мен шабытты шығармашылығы жайында естеліктерімен бөлісті. Сондай-ақ, Несіпбек Айтұлының жары Манат Жүкенқызы мен ұлы Нұрат Несіпбекұлы кітапхананың сирек қорына ақынның қолжазбаларын табыстап, ақынның жырлары кітапхана қорын толықтыра түсті. Кездесу барысында Несіпбек ақынның ізбасарлары Арман Шеризат пен Азамат Серікұлы ақынға арнау айтып, шараның сәнін аша түсті.
Іс-шара аясында ақын шығармашылығына арналған «Ұлт рухының жыршысы – Несіпбек Айтұлы» атты кең көлемді кітап көрмесі жасақталды. Көрмеге көрнекті тұлғаның кітаптары, басылым беттерінде жарияланған мақалалар, сондай-ақ ақынның жеке қорынан алынған кітаптар қойылды.