13 желтоқсан – Алаш Орда үкіметінің құрылған күні: ақпараттық сағат

12 желтоқсан күні Абай кітапханасының қызметкерлері Алаш Орда үкіметінің құрылған күніне орай Семей қаласының көпсалалы колледжінің студенттеріне ақпараттық сағат өткізді.
13 желтоқсан – қазақ тарихындағы аса маңызды күндердің бірі. Бұл күні 1917 жылы ұлттық мүддені қорғауды мақсат еткен Алаш Орда үкіметі құрылды.
Іс-шара барысында кітапхана мамандары студенттерге Алаш қозғалысының тарихы, оның жетекшілері мен қайраткерлерінің өмір жолы және қоғамдық қызметі туралы кең көлемді дәріс оқыды. Әлихан Бөкейхан, Ахмет Байтұрсынұлы, Міржақып Дулатұлы, Халел Ғаббасов сынды Алаш зиялыларының ел тәуелсіздігі жолындағы күресі мен ұлт болашағы үшін атқарған еңбектері жан-жақты баяндалды.
Сонымен қатар, студенттерге «Алаш электронды кітапханасы» таныстырылып, ондағы тарихи деректер мен құнды еңбектерді пайдалану жолдары көрсетілді. Бұл электронды ресурс студенттердің ғылыми ізденістеріне, тарихи санасын қалыптастыруға және ұлттық құндылықтарды дәріптеуге үлкен мүмкіндік беретіні атап өтілді.
Ақпараттық сағат жастардың тарихқа деген қызығушылығын арттырып, олардың ұлттық рухын көтеруге бағытталған тағылымды шара болды.