Ертіс өңірінің спорт аңыздары: өлкетану клубы

4 ақпан күні Қысқы Олимпиада ойындарына орай Абай атындағы кітапхананың маманы Электротехника колледжінде өлкетану үйірмесінің кезекті отырысын өткізді. Танымдық шара барысында жастар заманауи қысқы спорт түрлері жайлы пікір алмасып, өздерінің спортқа деген қызығушылықтарымен бөлісті. Сонымен қатар Италияда өтетін Қысқы Олимпиадада ел намысын қорғайтын Қазақстан құрамасы туралы мағлұмат алды. Кітапханашы жасөспірімдердің назарын қазіргі заманғы қысқы спорт түрлеріне аударып, олардың маңызын атап өтті.

«Ертіс өңірінің спорт аңыздары» атты өлкетану сабағы XIX ғасыр мен XX ғасырдың басындағы қаламызда спорт пен дене шынықтыру қозғалысының қалыптасуы мен даму тарихына арналды. Шара барысында қатысушылар қазақтың ұлттық спорт түрлерімен танысып, аты аңызға айналған Қажымұқан палуан мен жерлесіміз Василий Ярковтың жеңіске толы жолы жайында қызықты деректерге қанықты. Сондай-ақ өңірімізде француз күресінің дамуы кеңінен сөз болды.

Маман 1920 жылдардың соңы мен 1950 жылдар аралығында ұлттық ойындарды зерттеу, жарыс ережелерін жүйелеу, оларды республикалық спартакиадалар бағдарламасына енгізу үдерісі қалай жүргенін баяндады. Төңкерістен кейінгі кезеңдегі спорттың дамуы мен қаламыздағы алғашқы спорт клубтарының тарихы да назардан тыс қалмады. Қатысушылар үшін ерекше қызық мәлімет – Қазақстандағы алғашқы жергілікті Олимпиада ойындарының 1913 жылы ағайынды Смородинниковтардың ұйымдастыруымен дәл біздің қаламызда өткендігі болды.

Шара соңында викторина ұйымдастырылып, белсенді қатысушыларға спорт тақырыбындағы кітаптар сыйға тартылды.