Өлке тарихындағы танымал тұлғалар: Павлодар қаласындағы С.Торайғыров атындағы кітапханадағы Абай атындағы кітапхана күні
26 ақпан күні Абай атындағы кітапхана Павлодар қаласындағы С.Торайғыров атындағы кітапханада болып, керекулік оқырмандарға интеграциялық шаралар аясында имидждік шаралар топтамасын ұсынды.
Павлодарлық оқырмандарды ШҚО әкімі Б.М.Сапарбаевтың бастамасымен «Алтай-Ертіс кітапханасы» сериясы бойынша жарық көрген басылымдар бойынша жасақталған «Шығыстың рухани мұрасы» атты кітап көрмесі қарсы алды. С.Торайғыров атындағы облыстық кітапхана директоры М.А.Жиенбаева мен Павлодар облыстық тілдерді дамыту басқармасының бас маманы Б.Қ.Қайыр көрменің лентасын қиды. Шығыс өңірінен шыққан танымал тұлғалардың жаңадан жарық көрген таңдаулы шығармалары таныстырылды.
Аталмыш шара «Сирек қор: Қазақ елі ғылыми басылымдарда» тақырыбындағы ретро-көрмеге шолумен жалғасын тапты. Оқырман қауым XVIII-XIX ғасырларда және XX ғасырдың басында жарық көрген 200-ге тарта басылымдардан жасақталған ретро-көрменің «Семей – ғасырлар тоғысында», «Өлке тарихы және Семей Географиялық Бөлімшесі», «Абай таныған кәусарлар», «Абай заманындағы рухани қазына», «Қазақ әлемі ғалымдар зерттеуінде», «Жаһан жауһарлары», «Тарих толқынындағы қазақ зиялылары», «Абай мұрасы-адамзаттың асыл қазынасы» бөлімдерінен орын алған кітаптармен танысты. Қатысушалар көрмеден орын алған далалы өлкені зерттеушілердің еңбектеріне, қазақ зиялыларының шығармаларына, әлемдік әдебиеттің жауһарларына басты назар аударды.
Кітапхананың конференция залында «2014 жылы Семей өңірі бойынша аталып өтетін күндер күнтізбесі» бойынша өлкеміздің танымал тұлғалары: Айткеш Толғанбаев, Бибігүл Төлегенова, Николай Коншин, Төкен Ибрагимов, Жәнібек Кәрменов Төлеу Көбдіков, Феодор Достоевский, т.б. туралы өлкетанулық слайд-шолу өткізілді. Қатысушылар Семей өңірінің танымал тұлғаларының шығармашылығымен, қоғамдық қызметімен кеңінен танысты.
Оқырман назарына ұсынылған «Әлемді шарлаған әмбебап скрипкашы» атты өлкетану оқуында қазақтың тұңғыш скрипкашысы, жерлесіміз Әйткеш Толғанбаев туралы мол мағлұматтар берілді. Кітапхана қорында Ә.Толғанбаевтың скрипкада өз орындауында сақталған аудиожазбасы мен мерейгердің інісі В.Толғанбаевтың видео-естелігі қатысушылардың қызығушылығын тудырды. Семейлік ақын, өнертанушы Қ.Ж.Нұрқасымның орындауындағы әндер шаралар барысын әрлендіре түсті. Ұйымдастырылған шараларға 100-ге тарта Павлодар қаласы оқу орындарының студенттері мен ауыл және қала кітапханалары мамандары қатысты.
Біздің кітапхананың С.Торайғыров атындағы Павлодар облыстық кітапханасындағы күні Абай кітапханасының сайтына шолумен және кітапханашы мамандардың іс-тәжірибе алмасуымен тәмәмдалды. С.Торайғыров атындағы кітапхана қызметкерлері семейлік әріптестерін жылы жүзбен қарсы алып, шаралардың өз дәрежесінде өтуіне зор үлес қосты. Көршілес облыстық кітапхананың мамандары Павлодар өңірі оқырмандары үшін ұйымдастырылған рухани маңызды шара алдағы уақытта да өз жалғасын табады деген сенімде.