Жүрегімнің түбіне терең бойла:мерекелік іс-шара
Бүгін 3 қазан күні Абай атындағы кітапхананың ірге тасы қаланған күні кітапханада «Абайдың рухани орталығы» ашылды.
Шараға жиналған зиялы қауым мен қала мектептерінің абайтану пәні мұғалімдерін, ЖОО мен колледж, мектеп кітапханашыларын Ә.Қашаубаев атындағы филармонияның орындауындағы Абай әндері қарсы алды. Қатысушы мамандар Абай шығармалары мен абайтануға байланысты басылымдардан жасақталған «Әлемге танылған тұлға» тақырыбындағы кең көлемді кітап көрмесімен танысып, абайтанушы ғалымдармен жүздесті. «Дариға-ай» жастар теартының әртістері Абай өлеңдерінен дайындаған композициясын ұсынды. Қазақстанға еңбегі сіңген мәдениет қайраткері, абайтанушы Т.С.Ибрагимов Ұлы Абай мұрасын дәріптеп ұлықтауда өткізіліп отырған шараның игілікті іс екендігін айтып өтті.
Аталмыш шара барысында мерейтой қарсаңында ашылған «Абайдың рухани орталығының» тұсаукесері рәсімі өткізілді. Ақын, Қазақстан Жазушылар одағының мүшесі М. Сұлтанбеков пен Семей қалалық мәдениет және тілдерді дамыту бөлімінің басшысы Б.К.Көпбаев рухани орталықтың лентасын қиып, орталықтың қызметіне сәттілік тіледі. Абайдың рухани орталығында сирек басылымдар қорындағы Абай оқыған әдебиеттер әлемінен ұйымдастырылған кең көлемді кітап көрмесімен танысты. Рухани орталыққа кітапхананың байырғы оқырманы Ф.О.Байғабылов араб қарпімен басылған Абайдың толық шығармалар жинағын сыйға тартты.
Мерекелік шара Өскемен қаласынан келген А.С.Пушкин атындағы облыстық кітапхананың «Біздің Абай» электрондық кітапханасының http://irbis.pushkinlibrary.kz:8087/jirbis2/index.php?lang=kz тұсаукесерін өткізу рәсімімен жалғасты. Өскемендік әріптестер қатысушыларға жобаны жасаудағы мақсаты мен бүгінгі оқырмандар үшін маңыздылығын айтып, әріптестерінің сұрақтарына жауап берді.
Жиналған зиялы қауым атынан Жоғары педагогикалық мектептің директоры, ғалым, филология ғылымдарының докторы, профессор А.С.Еспенбетов А.С.Пушкин атындағы облыстық кітапхананың «Біздің Абай» жобасы Абай әлемін бүкіл дүние жүзіне таратудағы үлкен қадам екенін айтып, кітапхана ұжымына шығармашылық табыс тіледі.