Жырларым менің – сырласым: ақын, сазгер, Мәдениет қайраткері Елдар Оразалымен әдеби-сазды кездесу

Шығыс Қазақстан облыстық Абай атындағы әмбебап кітапханасында 2015 жылдың 13 наурызында «Жырларым менің – сырласым» атты тақырыпта әдеби-сазды кездесу өтті

Аталып тұңғыш есімім,
Дүниенің аштым есігін.
Саяңда өстім, есейдім,
Туған жер – алтын бесігім- деп жырлаған ақын Елдар Оразалымен Шығыс Қазақстан облыстық Абай атындағы әмбебап кітапханасында 2015 жылдың 13 наурызында «Жырларым менің – сырласым» атты тақырыпта әдеби-сазды кездесу өтті.

Қазақ әдебиетінің қадірменді жазушысы, ұлағатты ұстаз Кәмен Оразалин шаңырағынан шыққан,асылдың тұяғы Елдар әке жолын жалғастырып, туған жеріне кірпіш болып қаланды, мәдениет саласын басқарудағы іскерлік, ұйымдастырушылық қабілетімен, жобаларымен көптеген жетістіктерге жетуге айтарлықтай зор үлес қосты.
Елдар Оразалының өмір жолдары туралы, оныңкәсіби маман,ақын, әуезді әндерімен сазгерлік, әншілік қасиеттерін бейнелеген слайд көрсетілімі арқылы жасалған кітапханашының мазмұнды шолуынан кейін қонақтарға сөз берілді. Кездесуге келген қаланың зиялы азаматтары Т.Ибрагимов, С.Тәбәрікұлы, О.Кәріпжанұлы, әулеттің атынан Самар Оразалин сөз алып, ақын туралы, өлеңдері туралы жылы лебіздерін білдірді.

Кітапхана жанынан құрылған «Поэзия бұлағы» клубының жас ақындары ақынның лирикалық сезімге толы өлеңдерін шабыттана оқыды.
«Төгілген тердің көрсем деп кейде жемісін,
Жүресің болжап уақыттың барар өрісін…»-деген жаны сұлулыққа, көкірегі биік армандарға толы ақын Елдар Оразалышараға қатысып отырған Шәкәрім атындағы Семей мемлекеттік университетінің филология факультетінің және М.Әуезов атындағы педколледж студенттері тарапынан қойылған сұрақтарына сөз маржанын төгілте өлеңмен де қара сөзбен жауап берді.
Кешке арнайы келген «Қаламқас» ансамблінің әншілері Т.Көзбаева,Н.Өмірбек, Е.Жолжігіт, А.Берлешова ақын әндерін орындап,қатысушыларға әдемі көңіл-күй сыйлады.

2014 жылы 27 қарашада облыстық А.Пушкин атындағы кітапхананың ұйымдастыруымен өткен «Менің өлкем-менің Отаным» атты байқау қорытындысында Е.Оразалының «Уақыт жемісі» атты өлеңдер мен әндер жинағы «Таңдаған жұмысына берілген» номинациясы бойынша берілген арнайы диплом иесіне табыс етілді.
Шараға қатысушылар «Жыр жазамын жүрегіммен» атты кітап көрмесіне қойылған ақынның кітаптарымен, мерзімді басылым мақалалармен танысты, ақын туралы құрастырылған бетбелгі, буклеттер үлестірілді.
Кеш қонағы Семей жұртшылығымен кездесуге мүмкіндік берген Абай атындағы әмбебап кітапханаға ризашылығын білдіріп, өзінің жақында ғана шыққан «Уақыт жемісі» атты кітабын қолтаңбасымен кітапханаға сыйға тартты. Осы кітаптың ізімен шабытты өлеңдеріңізбен оқырман қауымды қуанта беріңіз, тартымды кітаптарыңыз кітапханамыздың өлкетану қорын толықтыра берсін деген тілегімізбен ақынға ақ жол тіледік. Шара қатысушылары ақынмен естелікке суретке түсті.