Әкелі балалы Мұхамедхан Сейітқұлов пен Қайым Мұхамедхановты еске алу: танымдық сағат
31 мамыр күні Абайдың рухани орталығында оқырмандарға ұлтымыздың жарқын болашағы үшін күрескен 37-нің құрбаны Мұхамедхан Сейітқұловтың туғанына 145 жыл толуына орай «Әкелі балалы Мұхамедхан Сейітқұлов пен Қайым Мұхамедхановты еске алу» атты танымдық сағат өтті.
Қос тұлғаға қатысты «Тұғыры биік тұлға» атты әдебиеттер көрмесі ұйымдастырылды. Зерделі әкенің, өнерлі ананың отбасында бүгіндері аты аңызға айналған талай марқасқалардың дидарын көріп, әңгімесін тыңдап, ұлы Абайдың үй-іші, ет бауыр туысқандарымен араласып, рухына мықты жігер, қуат алып өскен бала Қайым 25 жылға лагерге айдалғанда да ауыртпалықты мойымай көтере білген нар тұлға жайлы шараға қатысушы ғалым Арап Слямұлы, этнограф М.Жанболатов ой-түйіндерін «Дариға-ай» жастар театрының күрескер әке мен бала сюжетінен спектаклінің үзіндісі толықтырды. Әулеттің өкілі Дегдар Қайымұлы отбасы тарихынан әңгімелеп, ризалыққа толы ықыласын білдірді. Шараға өнертанушы Құсмілия Жырғалыұлының орындауында алаш құрбандарына арналған жыр толғаулары мен А.Манабаевтың сөзіне Т.Базарбаев әнін жазған Қайым Мұхамедхановқа арнау ән ерекше әр берді. Кітап көрмесіне Қ.Мұхамедхановтың зерттеу монографиялары, ол жайлы кітаптар мен бейне таспалар, әкесі жайлы құжаттар көшірмелері қойылды.