Абай мұрасы ұрпаққа ұлағат: конференция
2015 жылдың 15 шілдесінде Смитсон институты (АҚШ) Азия тарихы, мәдениеті бағдарламасының директоры, профессор Пол Тейлордың ұсынысымен, Семей қаласы Ішкі саясат бөлімі, Мәдениет және тілдерді дамыту бөлімі және біздің Абай атындағы әмбебап кітапханасының ұйымдастыруымен ұлы Абайдың туғанына 170 жыл толуына орай «Абай мұрасы ұрпаққа ұлағат» тақырыбында конференция өткізілді.
Шараны кітапхана қонақтары ұлы Абай рухына тағзым етіп, Абай ескерткішінің басына гүл қою рәсімімен бастады. Қонақтарды кітапхана қорындағы әдебиеттерден жасақталған «Әлем таныған Абай» атты кітап көрмесі қарсы алды. Кітап көрмесімен танысқан шетелдік қонақтар Абай шығармаларымен жете танысты.
Абай мұрасы туралы қазақстандық ғылыми зерттемелерге қызығушылық танытқан қонақтарымыз Пол Тэйлор, Уильям Брэдфорд Смит, Джаспер Уэгх-Куасбарз, Тревор Меррион Семейлік абайтанушы ғалымдар А.С.Еспенбетов, Асан Омаровтармен кездесіп, Абай шығармашылығы, Ұлы Абай – қазақ ренессансының атасы, Абайдың ашылмай келген қырлары, Абай өміріндегі қоғамдық кітапхананың рөлі, Сирек басылымдар беттеріндегі Абайдың қайраткерлік тұлғасы тақырыптарында баяндамаларды тыңдап, абайтану саласындағы тың мағлұматтарға қанық болды. А.Пушкин атындағы ШҚО кітапханасының «Біздің Абай» электронды www.Pushkinlibrary.kz кітапханасына шолумен танысты.
Смитсон институтының профессоры, Абайдың шығармашылық мұрасын зерттеуші Пол Тэйлор өз халқына Абай шығармашылығын терең таныту мақсатында жоспарлаған жобалары жайлы ойларын ортаға салды. Пол Тэйлордың әріптестері Уильям Брэдфорд Смит, Джаспер Уэгх-Куасбарз,Тревор Меррион Орта Азияның музыкалық мұрасы, ұлы ақынның ән шығармашылығы жайлы және зерттеулері туралы ойларымен бөлісіп, Абайдың музыкалық мұрасымен терең танысу мақсатында Семей қаласындағы Абайдың ән мұрасын зерттеуші және орындаушылармен кездесіп, ән орындау шеберліктері туралы ақпараттар алып, үнтаспаға жазды.
Пол Тейлор кітапхана қорына Түркменстан мемлекетімен атқарған жобасы аясында жарық көрген осы мемлекеттің өнері мен поэзиясы, музыкасы жайында ағылшын тілінде шығарған кітаптар топтамасын сыйға тартты.
Шетелдік қонақтар ұлы ақынның 170 жылдық мерейтойына байланысты сирек басылымдар қорынан жасақталған «Ғасырлармен үндескен асыл қазына» тақырыбындағы ретро көрмеге ерекше назар аударып, қордағы Абайдың қайраткерлік бейнесін ашатын құнды материалдармен танысып, қажетті мағлұматтар алды. Алдағы уақытта біздің кітапханамызбен тығыз байланыс жасап, Абай мұраларына байланысты жобаларды іске асырып, оны ағылшын тіліне аударып, баспадан шығару үшін еңбек ететіні жөнінде баяндады
Аталмыш шараға абайтанушы ғылымдар, жазушылар, ақындар, өлкетанушылар, оқытушылар, ЖОО және колледж кітапханашылары және БАҚ өкілдері қатысты.
Шетелдік қонақтар жұмыс бағдарламасын қала мұражайларына және мәдени орындарға саяхатпен жалғастырды.