Компьютер негіздерін меңгеру: тренинг
Шығыс Қазақстан облыстық Абай атындағы әмбебап кітапханасының Интернет орталығында 2015 жылғы 9-13 қараша аралығында «Компьютер негіздерін меңгеру» атты тренинг өткізілді.
Халық арасында егде адамдарға компьютер негіздерін меңгеру қиынырақ деген сөз бар. Алайда біздің тренингке қатысушы – 76 жасар зейнеткер Асылбек Түсіпов бұл қағиданы теріске шығарды. 5 күн ішінде ол компьютерлік технологиялардың жұмыс істеу принципін үйреніп, компьютерді іске қосу, өшіру, компьютер «тышқанын» қолдануға дағдыланды. Асылбек аға комппьютерде жұмыс істеу негіздерін жылдам меңгеріп алып, бүгінгі күні немерелерінің алдында көрген-білгендерін көрсетіп мақтануда. Тренинг барысында алған білімі Асылбек ағаның болашақта тұрақты компьютер пайдаланушысы болады деген сенімдеміз. Асылбек аға жеке үйретушінің болғанына, ыңғайлы жұмыс кестесі және өте жеңіл көрнекі мысалдармен түсіндірген кітапхана қызметкеріне ризашылығын білдірді. Жаңа технологияларды меңгеру Асылбек аға үшін жаңа қызықты өмірдің бастамасы болмақ. Енді компьютер негіздерін меңгерген зейнеткер ғаламтор арқылы қажетті ақпаратты тауып, әлеуметтік желілерде және Skype арқылы таныстарымен қарым-қатынас жасауды армандайды. Бұл мақсатта ол «Интернет негіздері» атты келесі курсқа қуана жазылды. Интернет орталығында егде адамдарды компьютерлік сауаттылыққа үйрету тәжірибесі одан әрі жалғасын таппақ.