Мүмкіндігі шектеулі адамдарды әлеуметтік оңалту мәселелері: дөңгелек үстел

2015 жылдың 4 желтоқсанында Абай атындағы әмбебап кітапханасында халықаралық мүгедектер күніне орай «Мүмкіндігі шектеулі адамдарды әлеуметтік оңалту мәселелері» тақырыбында дөңгелек үстел өткізілді. 1992 жылы БҰҰ Бас Ассамблеясы шешімімен 3 желтоқсан халықаралық мүгедектер күні болып белгіленді.

Дөңгелек үстел аясында мүмкіндігі шектеулі азаматтарды қоғамдық ортаға бейімдеу және оңалту мәселелері қарастырылды. Кітапхананың директоры Г.Т. Жігітбаева қатысушыларды құттықтап, БҰҰ даму бағдарламасы Семей қ. бөлімшесінің ұлттық директоры Ж.Ж. Жибраева қаладағы іске асырылып жатқан әлеуметтік жобалар туралы мағлұмат берді. Р.К. Байтлеуова арнайы әлеуметтік қызметтер көрсету орталығының әлеуметтік қызметтері туралы толық ақпарат берді. «Жұмыспен қамту және әлеуметтік бағдарламалар бөлімі» ММ басшысының міндетін атқарушы А.А.Құрманғалиев мүмкіндігі шектеулі азаматтарды жұмыспен қамту және 18 жастан асқан мүгедектерге әлеуметтік қызмет көрсету туралы сұрақтарға жауап берді.

Семей қ. Медицина университетінің жанынан құрылған волонтерлық топтың жетекшісі Майдан Досжан қала тұрғындарын еріктілер қатарына қосылуға шақырды. Қазіргі уақытта волонтерлық топ мүмкіндігі шектеулі балаларға Жаңа жылдық мереке ұйымдастыру үшін дайындық жұмыстарын жүргізіп жатыр.

Абай атындағы кітапханада мүмкіндігі шектеулі жандардың қажеттіліктеріне баса назар аудару дәстүрі қалыптасқан. Осы мақсатта кітапханада «Книгоноша», «Библиокөмек» әлеуметтік жобалары іске асырылып, «Объектив» атты фотосурет клубы жұмыс жасайды. Бұл бағытта кітапхана қоғамдық ұйымдар, мүгедектер бірлестіктері, әлеуметтік мекемелермен бірлесіп қызмет атқарады.

Аталмыш іс-шараға Семей қ. әкімі аппаратының қызметкерлері: жұмыспен қамту және әлеуметтік бағдарламалар бөлімі, ішкі саясат бөлімі, БҰҰ даму бағдарламасының Семей қ. бөлімшесінің ұлттық директоры, «Көмек», « Қазақ зағиптар қоғамы», «Шырақ» мүгедек әйелдер ассоциациясы, «Тіршілік үміті», «Асыл», «Исток», «Женщины и образование» қоғамдық ұйымдары, Д.Қалматаев атындағы медицина колледжі мен медицина университетінің волонтерлық топтары, сонымен қатар колледждерде білім алып жүрген мүмкіндігі шектеулі студенттер мен кітапхананың тұрақты оқырмандары Бектасов Нұркен, Арғымбаев Миршат, Борықбаев Саят, Ахмар Арман және Қанатбекова Маржан шақырылды. Шара соңында Маржан Қанатбекова қалалық мәдениет сарайының әншілерімен бірге «Ана-әке» әнін орындады.