Қайым, сирек басылым беттерінде: көрмеге шолу

  • 15.01.2016

15 қаңтар күні Семей қаласының әкімі мен әкім аппаратының өкілдері Абай атындағы кітапханада болып, Қ.Мұхамедхановтың 100 жылдығына арналған «Ғалым. Қайраткер. Тұлға» тақырыбындағы экспозицияланған кітап көрмесімен танысты.

16

Шолу барысында кітапхана қызметкері ғалымның зерттеген еңбектерімен, «Қайым Мұхамедханов атындағы білім және мәдениет орталығы» басып шығарған шығармаларымен және белгілі мүсінші, суретшілер Одағының мүшесі Оразымбай Бекбаевтың граниттен, бронзодан ғалымға арнаған жұмыстарымен таныстырды. Мерзімді сирек басылым беттеріндегі Қайым Мұхамедхановтың мақалалары ерекше назарда болды. 1937 жылғы 24 наурызда облыстық «Екпінді» газетінде латын харпінде өлеңдері басылып шыққан. Аталмыш газет беттерінде 1943 жылы 30 сәуірде ғалымның «Жалбыр», 1949 жылы 16 ақпанда И.А.Крыловтың 180 жылдығына «Абай және Крылов» атты мақалалары жарияланған. Сонымен бірге көрмеде Қайым Мұхамедханов өз зерттеулерінде қолданған Абай оқыған сирек басылымдар ұсынылды.