Абай деп соққан жүрегі : ақындар отырысы

2016 жылдың 26 қаңтарында Абай атындағы кітапхананың «Поэзия бұлағы» ақындар клубы жылдың кезекті отырысын өткізді.

Отырыс ғұмырын қазақтың ұлы ақыны Абайға арнаған, белгілі абайтанушы, ғалым Қайым Мұхаметқанұлының 100 жылдығына арналды. Аталмыш клубтың мүшелері ғалым еңбектеріне шолу әңгімелер айта келе, өз жадыларынан шыққан арнау өлеңдерін ортаға салды. Жас ақындардың жүректерінен шыққан тырнақалды арнаулары «Қайымға арнау», «Ғалым ағаға», «Ұлы ұстаз» деп аталып және т.б. Қ.Мұхаметқанұлының жан-жақты еңбектерін паш ететін өлең жолдарына толы болды.

Жыл өткен сайын «Поэзия бұлағы» ақындар клубы өз мүшелерімен толығып келеді. Осы отырыста клубқа жаңа мүшелер келіп, бірлесіп шығармашылықтарын шыңдауға ықыластарын білдірді.

Сондай-ақ, отырыста клубтың жылдық жоспары ақындарға таныстырылды. Кезекті ақындар отырысы клуб мүшелерімен ақылдаса келе, ай сайын екі рет, яғни айдың 3- ші және 4-ші апталық жұмасында сағат 15.00- ге бекітілді.