Алтын Тұрғысын: халықаралық фестиваль
Шілде айының 8 мен 10 жұлдызы аралығында Абай атындағы кітапхананың «Кілт» авторлық әндер клубының мүшелері «Алтын Тұрғысын» атты ІХ Халықаралық көркемөнер фестиваліне қатысып қайтты.
Фестиваль Зырян ауданының Кутиха мекенінен құлашсозым жерде Тұрғысын өзенінің маңындағы алаңқайда өтті. Шараға Қазақстанның, Ресейдің, алыс шетелдердің бірқатар қалаларынан ақындар, бардтар, музыкалық ансамбльдер, суретшілер мен фотографтар қатысты. «Алтын Тұрғысын» фестивалі 2008 жылдан бері әдеби шығармашылық, халық шығармашылығы, авторлық әндер, вокал және суретке түсіру өнері бойынша өткізіліп келеді. Көркемөнер фестивалінде қатысушылар мен келген қонақтарды қоса санағанда барлығы 300-ден астам адам бас қосты. Клуб музыканттары Тимур Аубакиров, Сергей Назаров және Андрей Гамбург «Авторлық өлең. Әнші-автор» аталымы бойынша өнерлерін ортаға салып бақтарын сынады. Яғни, олар сөзі мен әнін өздері жазған үш әнді шырқады. Осы аталым бойынша 50 қатысушы өздерінің бағын сынап көрді. Фестивальдің алқақазы мүшелері семейлік әншілердің музыкалық, әрі әдеби қабілеттері мен ән салу шеберлігіне жоғары баға бере келе, «Фестиваль лауреаты» дипломымен марапаттады. Шара мәресіне жеткен соң, ұйымдастырушылар жас қатысушыларға естелік сыйлық және кітапханаға «Зыряновску 220 лет – исторический фотоальбом» кітабын тарту етті.
