Жыр жазамын жүректен … : клубтың кезекті отырысы
27 сәуір күні Абай атындағы әмбебап кітапханасының «Поэзия бұлағы» ақындар клубы, аталмыш клуб мүшелерінің шығармашылығымен жете таныса түсу үшін «Жыр жазамын жүректен …» тақырыбында кезекті отырысын өткізді. Шара барысы өлең өрімдері, құрылымы, құрылысы, ұйқас түрлері туралы дәріс айтылып, ортаға жаңадан келген жас ақындармен танысудан басталды. Клуб мүшелері өздерінің жүрекжарды лирикаға толы туындыларын ортаға салды. Жас ақындардың жырлары тыңдалып, қатысушылар тарапынан пікірлер айтылды. Ақындардың ой ұшқырлықтарын шыңдай түсу үшін «Ұйқасын тап» ойыны ойнатылды. Бұл ойында «Менің Елім», «Қазақстаным», «Қазағым» т.б. тақырыптар беріліп, ақындар уақытты ұтымды пайдалана отырып, өлең ұйқастарын сәтті құрастыра білді. Ақындар сонымен қоса отырыс қызықты, әрі тартымды өтуі үшін «Жалғастыр» ойын тәсілін пайдаланып, келе жатқан 7 мамыр – Отан қорғаушылар күні, 9 мамыр – Жеңіс күніне орай «Желбірейді жеңіс туы», «Мен елімнің Ұланымын» атты өлеңдерін дүниеге әкелді. Отырыс соңында жас ақындар «Жас толқын» сериясымен шыққан туындылармен танысып, тарқасты.
