Әке мен бала – Мұхамедхан Сейтқұлов пен Қайым Мұхамедханов – Отан патриоттары: кітаптың тұсаукесері
30 мамыр күні Абай атындағы әмбебап кітапханасында «Әке мен бала – Мұхамедхан Сейтқұлов пен Қайым Мұхамедханов – Отан патриоттары» атты кітабының тұсаукесер рәсімі өтті. Елбасының «Болашаққа бағдар: рухани жаңғыру» мақаласында айтылған ұлттық құндылықтарды жаңғыртудың бағыттарына толықтай жауап беретін адамгершілік құндылықтарға дәріптейтін еңбектің тағылымдық маңызы зор.
Қатысушылар қаланың білім және мәдениет мекемелері, зиялы қауым, кітапханашылар және студенттер. Кітаптың тұсаукесер рәсімінің ашылу салтанатының лентасын Шәкәрім атындағы мемлекеттік университетінің тарихшы-ғалымы А.Исаұлы мен кітапхана директорының орынбасары Г.Аязбаева қиды.
Жаңа туындыны оқырмандарға таныстыру үшін сөз алған «Қайым Мұхамедханов атындағы білім және мәдениет орталығы» қоғамдық қорының директоры, профессор Дина Мұхамедхан кітаптың мақсатын, алаштың екі азаматы әке мен баланың ел игілігі үшін жасап кеткен ұлан-ғайыр іс-әрекеттері туралы, кітапқа енгізілген суреттер мен мұрағат материалдары туралы ойларымен бөлісті. Кітап туралы лебіздерін ғалым, ұстаздар М.Сұлтанбеков, А.Исин, А.Ахметжанов, А.Қадыровтар білдіріп, ғалымның адами қасиеттерін әңіменің арқауы етті.
«…өлсем, Алаш азаматтарынан жаным артық емес…» деген өсиет сөзін қалдырған тұлғаның елін, жерін, халқын сүюге, Отанын сатпауға, шынайы адалдыққа насихаттауда шығарманың келер ұрпаққа берер мағлұматы зор. Ғалымның шәкірті өнертанушы Қ.Жырғалұлы ұстазға арнаған өлеңін оқып, әнін орындады. Ғалым Т.Жұртбайдың өтінішімен «Ұраным Алаш» атты кітабының орыс тіліндегі нұсқасын кітапханаға тарту етті. Қатысушыларға Алаш қозғалысының 100 жылдығына орай ұйымдастырылған «Алаш» электронды кітапханасы таныстырылды. Шара соңында Дина Мұхамедхан шығармашылық байланыстары үшін ризашылық сезімін білдіріп, бірнеше мекемелерге және жеке адамдарға Алғыс хат пен мерекелік медалін табыстады және Абай кітапханасына кітаптың бірнеше данасын сыйға тартты. Соңында жиналғандар естелік суретке түсті. Шараға арналып «Ғалым.Тұлға.Қайраткер» атты кітап көрмесі ұйымдастырылып шолу жасалынды.
