Сахараның дана ойшылы: кітап көрмесі

Бүгін ақын, ойшыл, композитор, аудармашы Шәкәрім Құдайбердіұлының туған күні. Шәкәрім қажының туғанына 159 жыл толуына орай кітапхана Семей қалалық орталық саябақ қызметкерлерімен бірлесіп 24 шілде күні қала тұрғындары мен қонақтары үшін шара өткізді. Бұл күні саябақ демалушыларына саябақ қызметкерлері Шәкәрім әндерін шебер орындаушы Келденбай Өлмесековтың орындауындағы әндерді ұсынылып, демалушыларға көтеріңкі көңіл күй сыйлады.

Кітапхана қызметкерлері кітапхананың бай қорындағы Шәкәрім шығармашылығына байланысты басылымдар қорын ұсынып, «Сахараның дана ойшылы» атты кітап көремесіне шолу жасады. Кітап көрмесіне кітапхана қорында сақталған Шәкәрім Құдайбердіұлының қаламынан туындаған терең ойлы, сыршыл лирикалық өлеңдері, «Қалқаман-Мамыр», «Еңлік-Кебек», «Нартайлақ-Айсұлу» сияқты оқиғалы дастандары, «Әділ-Мәрия» романы және басқа да прозалық туындылары, аудармалары, тарихқа, философияға қатысты еңбектері қойылды. Саябақ демалушылары мен қала тұрғындары ақынның философиялық өлеңдеріне аса назар аударып, қызығушылық танытты. Кітапхана қызметкерлері саябақ демалушыларына Шәкәрім Құдайбердіұлының шығармашылығы мен өмірбаянын баяндайтын буклеттер мен жарнамалар таратты.

Шараға қатысушы жастарға Абай елінің тумасы Рүстемов Серікхан Шәкәрім қажының шығармашылығын оқуға шақырып, ақынның шығармашылығы туралы әңгімеледі. Кітапханамыздың оқырманы, гуманитарлық-экономикалық колледжінің түлегі Алдонгарова Айым Шәкәрім Құдайбердіұлына арнап шығарған бірнеше өзінің жүрекжарды өлеңдерін оқыды.