Жазушы мұрасы – халық жадында: кітап көрмесі

13 қазан күні Абай атындағы кітапхана қызметкерлері Қазақстанның халық жазушысы, Абай атындағы мемлекеттік сыйлықтың лауреаты, А.Фадеев атындағы Халықаралық әдеби сыйлықтың лауреаты, Қазақстан жазушылар Одағының мүшесі, соғыс ардагері Әзілхан Нұршайықовтың туғанына 95 жыл толуына орай «Жазушы мұрасы – халық жадында» тақырыбында кітап көрмесі ұйымдастырылды. Көрмеге жазушының әр жылдарда жарық көрген шығармалары қойылды. Жазушының таңдамалы романдары, повестері және журналистік ізденістері жинақталған «Таңдамалы шығармаларының он томдығы» оқырмандар қызығушылығын тудырды. Жазушының соғыс жайлы «Әскери күнделік» кітабында мынадай дәлел бар: Нұршайықов он тоғыз жасында майданға аттанды. Оның ақындық талантын қасында жүрген майдангер достары да байқаған. Дәл сол кездері Жамбылдың соғыста жүрген ұлына арналған барлық өлеңдері айтылып жүрді. Қазақ ақынының өлең жолдарын сарбаздар мен офицерлер әкелерінің сезімдері ретінде қабылдады. Жауынгерлер ақынға деген өз сезімдері мен алғыстарын Әзілхан өлеңдерінде көрсетуін сұрады. «Боздақтар» кітабы да соғыс тақырыбына арналған. Сондай-ақ, Ә.Нұршайықовтың Әуезов туралы «Дорогой памяти», еңбек адамдары жайлы «Портрет», «Автопортрет» т.б. шығармалары көрме төрінен орын алды.

Әзілхан Нұршайықов туралы «Әз-аға», «Махаббат жыршысы», мерзімді басылымдар бетінде жарияланған эссе, естеліктер пайдаланушылардың жазушы шығармашылығына қызығушылығын оятты.