Рухани жаңғыру: Latyn – құнды мұра: кең көлемді ретро-көрме

27 ақпан күні Абай атындағы кітапхананың мамандары «Рухани жаңғыру» бағдарламасы аясындағы кезекті іс-шарасын Зайсан аудандық кітапханасында жалғастырып, өңірдің кітапханашы мамандарымен және кітапхана оқырмандарымен, қаланың зиялы қауымымен кездесті. Шараға жиналған қонақтарды кітапхананың алтын қорынан жасақталған «Рухани жаңғыру: Latyn-құнды мұра» тақырыбындағы кең көлемді кітап көрмесі қарсы алды. Көрмеден көрініс тапқан 1929-1940 жылдары латын қарпімен қазақ тілінде жарық көрген басылымдарға шолу жасалып, кітап авторларымен, кітаптар тарихымен, мазмұнымен таныстырылды. Қазақстан Республикасы Парламенті Мәжілісінде ақпан айында қабылдынған Мемлекеттік тілдің латын графикасындағы әліпбиінің бірыңғай стандартын енгізу мәселелері туралы, жаңа ұсынылған латын қарпіндегі қазақ әліпбиінің соңғы нұсқасы жайында тың ақпараттар берілді. Қатысушылар көрменің QR-код сөресінен орын алған латын қарпіндегі сирек басылымдардың мәтінімен танысу мүмкіндігіне ие болды.

Шығыс Қазақстан облыстық Абай атындағы әмбебап кітапханасының (semeylib.kz) сайтына орналастырылған түрлі ресурстар ұсынылып, мамандарға кеңес берілді. Алаш үкіметінің 100 жылдығына арнайы ұйымдастырылған «Алаш» электронды кітапханасының барлық айдарларын ашып, кітапхана қорына енген құнды құжаттар көрсетілді.

Сондай-ақ, мамандарымыз қатысушыларды ҚР электрондық кітапханасының қорымен таныстырып, пайдаланушылардың қойған сұрақтарына жауап берді. Тұрақты зайсандық оқырманымыз Қалибек Алтыбайұлының тапсырысы бойынша Зайсан өңірінің тарихы мен табиғатына қатысты құнды өлкетану қорынан 5 сирек басылым ұсынылып, Е.Михаэлис, Б.Герасимов, Седельниковтың ғылыми мақалаларының көшірмесі тапсырылды.

Мамандарымыз Рухани жаңғыру бағдарламасы аясындағы кезекті жұмысын жалғастыруға Сарытерек ауылына жолға шықты.