Қасымда болсын Анам!: ойын бағдарламасы

2 наурыз күні Абай атындағы кітапханада «8 – наурыз Халықаралық әйелдер күні» мерекесіне орай «Қасымда болсын Анам!» атты мерекелік ойын бағдарламасы ұйымдастырылды. Мерекелік мәдени шараға қаламыздағы №35 ЖББО мектептің 2 «а» және 2 «ә» сыныбының оқушылары мен ұстаздары қатысты. Көктемнің шуақты күндерімен қатар келе жатқан мерекеге арналған шара барысында оқушыларға көктем туралы, 8 – наурыз мейрамының шығу тарихы туралы, әр елдерде аталмыш мерекенің аталып өту дәстүрі жайында ақпараттар берілді. Сондай-ақ қоғамда, қазақ тарихының әр кезеңінде ерлігімен, даналығымен, парасаттылығымен барша жұртқа өнеге бола білген қазақ әйелдері мен батыр қыздары жайында мәліметтер беріліп, экраннан «Ана – өмірдің шуағы» тақырыбындағы бейне-фильм көрсетілімі ұсынылды.

Мерекелік ойын-сауық барысында балалар екі топқа бөлініп, атақты аналардың есімін табуда «Қос конверт», ана туралы мақал-мәтелдердің жалғасын табуда «Кім көп біледі?», «Сәйкестендіру» тесті, «Түймедақ» сияқты қызықты танымдық ойындар ойынап, өздерінің білімдері мен өнерлерін ортаға салды. Шараға қатысушы ер балалардың тарапынан қыздарға арнайы тосын сый жасалып, «Мейірімді қыз» құттықтау алқасы табысталды. «Сыйқырлы қоржыннан» балаларға тәттілер таратылып, тамаша меркелік көңіл-күй сыйланды.

Қатысушылардың назарына балалар әдебиеттері бөліміндегі әйел тақырыбына жазылған шығармалар, өлеңдер жинағы, қыз балаларға арналған анықтамалық басылымдардан тұратын «Ана – бақыт деген кітаптың бірінші парағы» тақырыбында кітап көрмесі ұсынылып, шолу жасалды. Кеш соңында жас оқырмандарға кітапханада арнайы экскурсия жасалып, тамаша меркелік көңіл-күймен тарқасты.