Қазақтың аңыз аналары: кең көлемді кітап көрме

Жер бетіндегі тіршіліктің өзегін келешекке жалғаған аналар мерекесі қарсаңында, 6 наурыз күні Абай атындағы кітапхананың қызметкерлері

Р. Байсейітов атындағы қаржы – экономикалық колледж студенттеріне  қоғамдағы  ананың орнын,  ізгі ниеттерін дәріптеу мақсатында «Қазақтың аңыз аналары» атты үш бөлімнен тұратын кең көлемді кітап көрмесін ұсынды.

Кітапхана қызметкерлері қазақтың абыз, аңыз  аналары мен қалың елдің туы болып көш бастаған, ханым-аналар Рабиға Сұлтан Бегім, Айша бибі, Тұмар ханым, махаббат символына айналған ару қыздардың –өмір белестерін қамтитын Қыз Жібек, Баян сұлу  т.б. аналардың өмірін арқау етіп жан – жақты сыр шертіп,  қазақтың өнер жұлдыздары жайлы да  өз ойларын ортаға салып, пікір алмасты. Сонымен қатар сын сағатта өшпес ерлік көрсеткен   қаһарман қыздар туралы   естеліктер тыңдаушылардың мақтаныш сезімін оята түсті.

Шара барысында  әйелдердің тағылым аларлықтай қадір – қасиетін әдемі де әсерлі етіп бейнелейтін  қазақ жазушыларының шығармалары  «Қазақ халқының тарихи тұлғалары», «Сүйінбике – ұлы дала аруы», «Айналайын халқымнан еркелеткен», «Күйші Дина»,  «Азаттық аңсағандар», «Алғашқы қарлығаштар» және т.б. кітаптар мен мерзімді басылымдар беттерінде жарық көрген мақалалар топтамаларынан жасақталған кітап көрмесіне шолу жасалды.  Кітап көрмесі аты аңызға айналған «Домалақ ана»,  қазақтың тұңғыш ұшқыш қызы Хиуаз Доспанованың  ерліктерін баяндайтын және   «Тақиялы періште» фильмінде ән салған жезтаңдай әнші Бибігүл Төлегенованың орындауындағы «Ана» әні жайлы бейнекөрсетілімдерді тамашалаумен аяқталды.

Аналарға деген құрмет таңғажайып архитектуралық ғимараттан, аналар құрметіне қойылған ру аттарынан да байқалатыны сөзсіз, демек аталған  шараның жастарға берер өнегесі мол демекпіз.