Халық қаһарманы, жазушы Қасым Қайсеновтің «Жау тылындағы бала» кітабы бойынша оқырмандар конференциясы

Қасым Қайсенов көзі тірісінде аңызға айналған жан. Ол туралы бірнеше жыл бұрын өзі жазып кеткен кітаптарда, деректі фильмде оны танитын адамдардың есінде. 25 сәір күні Ұлы Жеңіс мерекесі қарсаңында аты аңызға айналған батыр, «Халық қаһарманы», қазақтың атақты жазушысы Қасым Қайсеновтың туғанына 100 жыл толуына орай жазушының «Жау тылындағы бала» кітабы бойынша оқырмандар конференциясы өткізілді. Конференцияға қатысқан Шәкәрім атындағы Семей Мемлекеттік Университетінің және Семей қаласының Қазақ гуманитарлық-заң университетінің филология факультетінің студенттерін жазушы шығармашылығы бойынша арнайы дайындалған «Қазақтың қастер тұтар қаһарманы» атты кітап көрмесі қарсы алды.

Шәкәрім атындағы Семей Мемлекеттік Университетінің студенті Жанатова Алина Қасым Қайсеновтың өмірлік және шығармашылық жолы бойынша бейнешолу дайындап, баяндама жасады. Конференцияда басты кейіпкеріміздің кішкентайынан басына түскен ауыртпашылықты жеңіп шығу жолындағы адамгершілік қасиеттері мен патриоттық сезімі туралы және шығармадағы жағымсыз кейіпкердің бейнесі жайында сұрақтар қозғалды.

Қатысушыларға Қасым Қайсеновтың шығармашылығы туралы жеке сайтындағы әңгімелер жинағы, очерктері, өлеңдері, мақалалары таныстырылды. Жастарға патриоттық тәрбие беретін шараның соңы студент-жастардың өз ой-пікірін білдіруімен аяқталды.