Отан қорғауға дайынбыз!: патриоттық ойын сайысы

3 мамыр күні Абай кітапханасында 7 мамыр – Отан қорғаушылар күніне және 9 мамыр – Ұлы Жеңіс күніне арнайы «Отан қорғауға дайынбыз!» атты танымдық патриоттық мерекелік шара ұйымдастырылды. Мәдени шараға қаламыздағы №16, №35 ЖББО мектептердің бастауыш сынып оқушылары қатысты. Бейбіт өмірді кең байтақ жерімізді  кейінгі ұрпақ үшін киелі болсын деп қан-майданға аттанған жауынгер аталарымыздың ерен еңбегі мен өшпес ерліктері ұрпаққа амананат боп қала бермек. Мерекеге арналған шарамыз қан майданда ерлікпен қаза тапқан батырларымыздың рухына арналған бір минут үнсіздікпен басталды. №35 мектептің «Батыр», №16 мектептің «Жігер» және №35 мектептің атынан келген «Ерлік» топтары жеті түрлі топтық ойын түрлерінен сайысқа түсіп, бақ сынасты. Аталған топтар арасында «Доп салу» , «Қол күресі», «Әскери жылдам киіну», «Жұлдызша,  жалау құрастыру», «Кім шапшаң»,  «Арқан тарту» ойындары өте тартысты өтті. Сайысқа қатысушы топтардың жетістіктері әр жарыс түрлері бойынша  1/3 балл көрсеткішінде бағаланды.  Соңында жалпы көрсеткіш есептелініп, қортынды бойынша сайыскерлер 1,2,3 орындарды бөлісті. Әділ қазылардың шешімі бойынша бірінші орынды №16 мектептің «Жігер» тобы, екінші орынды №35 мектепің «Батыр тобы», үшінші орынды 35 мектептің «Ерлік» тобы бөлісті.

Мерекелік басқосуға қатысушы көрермендердің назарына би биленіп, әннен шашу шашылды. Кішкентай бүлдіршіндеріміз №12 «Ажар» ясли бала-бақшасының «Аяла» тобының тәрбиеленушілері «Ромашка» биін билеп, №16 ЖББО мектептің 3 «Г» сынып оқушысы   Серікжан  Еркеназдың орындауына  «Ана туралы жыр» әні шырқалды.

Шара соңында сайысқа қатысушы жеңімпаз топтарға мақтау қағаздары табысталып, мәдени шараның жоғары деңгейде өтуіне қолдау көрсеткен ұстаздар мен топ жетекешілеріне алғыс хаттар мен сыйлықтар табысталды. «Отан қорғауға дайынбыз!» атты танымдық патриоттық мерекелік шараның өтуіне қаржылай демеушілік көрсеткен  соғыс ардагері Азаматов Зейнолда Қоқажанұлының ұрпақтарына үлкен алғыс білідіреміз.