«Артық білім кітапта»: кітап таныстырылымы
23 сәуір Бүкіл әлемдік кітап және авторлық құқық күніне орай Абай атындағы әмбебап кітапханада кемеңгер ақын Абай Құнанбайұлының 175 жылдық мерейтойына арнап дайындаған сирек басылымдар каталогының таныстырылымы шарасы өтті. ZOOM форматында өткен шара қонақтары каталогтың баспа көруіне ақыл-кеңесімен көмегін берген қаламыздағы Шәкәрім мемлекеттік университетінің профессоры, Қазақстанның еңбек сіңірген қайраткері Еспенбетов Арап Слямулы жалпы каталогтың сапасына, мазмұнына жақсы баға бере отырып, «Сирек басылымдардағы Абай», «Абай заманы өлкетану дереккөздерінде», және «Абай мұрагерлерінің еңбектері» бөлімдеріне кеңінен тоқталып, пікірін ортаға салды. Ғалым Семей Абайдың білім нәріне сусындаған ортасы болғандықтан қаладағы өлкетану музейі, Абай мемлекеттік мемориалдық музейі, Абай атындағы әмбебап кітапхана сынды мәдени мекемелер әріптестікте, қорларын біріктіріп, Абай пайдаланған әдебиеттердің толық каталогын дайындаса тамаша болар еді деген ұсынысын айтты.
XVIII ғасырдың соңы, XIX ғасыр мен XX ғасырдың басында жарық көрген сирек басылымдарымыздан іріктеліп алты бөлімде 209 әдебиет көрініс тапқан тұңғыш каталогымызға жоғары баға берген ғалым, этнограф-тарихшы, Қазақстан халық ағарту ісінің үздігі Мұхамадиұлы Мұхаметқазы «Абай мұрасы –адамзаттың асыл қазынасы», «Әлем тілдеріндегі Абай», «Абай мұрагерлерінің еңбектері» бөлімдеріне кең тоқталып, Қытай Халық Республикасында Абай мұраларының зерттелуі, жариялануы жайлы құнды деректерімен бөлісті.
Қазақ ауылында өсіп, қазақ тілін жете меңгерген, Шыңжаң университетінің түлегі қытай ғалымы Қабайдың (Ха Хуанджан) Абай шығармаларын қазақ тілінен тікелей қытай тіліне аударуы, Пекиннен «Ұлттар баспасынан» жариялауы туралы әңгіме өрбітті.
Алты бөлімнен және көмекші құралдар: «Есімдер көрсеткішімен», «Қазақ тіліндегі шығармалар көрсеткішімен», «Орыс тіліндегі шығармалар көрсеткішімен», «Шетел тілдеріндегі шығармалар көрсеткішімен», «Баспаханалар көрсеткішімен» жабдықталған каталогымызға жақсы бағасын бере отырып, сыни көзқарасын білдірген Шәкәрім атындағы Семей мемлекеттік университетінің “Қазақстан тарихы” факультетінің оқытушысы, профессор, тарих ғылымдарының кандидаты Исаұлы Амантай Исин болды. Амантай Исаұлы каталогқа басылымдарды кең көлемде қамтымағанымызды, әр автордың бірнеше жылғы басылымдарын енгізбегенімізді тілге тиек етті.
Шығыс Қазақстан өңірі кітапханаларына таратылып, оқырманға жол тартқан қазақ, орыс, ағылшын тілдерінде альбом түрінде, сапалы қағазға, басылымдардың фото суретімен жария көрген «Артық білім кітапта» каталогы кітапхана ұжымының тынбай еңбектенуінің арқасында жарыққа шыққан тырнақалды басылым болып табылады. Кітап таныстырылымы шарасында айтқан ескертпелер, ұсыныстар болашақта ескеріледі.
