Менің Қазақстаным: ақпараттық сағат

4 маусым күні Абай кітапханасының қызметкерлері Қазақстан Республикасының Мемлекеттік рәміздері күнін мерекелеу аясында Семей қаласының жалпы үлгідегі қарттар мен мүгедектерге арналған медициналық–әлеуметтік мекемесінің қамқорлығындағыларға «Менің Қазақстаным» тақырыбында ақпараттық сағат өткізді. Іс-шара қазақ және орыс тілдерінде өтті.

Ақпараттық сағат бірнеше бөлімнен тұрды. Алдымен, жиналған қауым ҚР Мемлекеттік рәміздерінің тарихымен танысты. Жиын барысында кітапхана қызметкерлері Қазақстан Республикасы әнұранының авторларына ерекше тоқталып өтті. Қатысушылар биылғы мерейтой иелері  – ҚР Әнұраны мәтінінің авторы Ж. Нәжімеденов және музыкасының авторы Ш. Қалдаяқовтың өмірі мен шығармашылығымен танысты. Сондай-ақ, Ж. Нәжімеденов пен Ш. Қалдаяқов туралы деректі фильм көрсетілді. Сонымен қатар, әлем елдері әнұрандарының тарихы таныстырылып, көрермендердің қызығушылығын оятты.

Ақпараттық сағат аясында арнайы кітап көрмесі жасақталды. Көрмедегі үш тілде шығарылған «Қазақстан Республикасының мемлекеттік рәміздері», М.Қ. Исакованың «Тамга казахов», Е.Ш. Шаймерденовтың «Қазақстан Республикасының мемлекеттік рәміздері», «Менің Отаным – Қазақстан» және басқа да кітаптар іс-шараның мазмұнын аша түсті.